Toukepra 22 - Angami Naga CL (Re-edited) Bible (BSI)

Thesu Zhoko

¹ Mia puoe thudo puo morei tekuo puo rügulie, di süu dukhriwa morei zewa ro, puoe thudo puo la thudo pengou mu tekuo puo la tekuo dia pie sutuo. Puoe thesu khashü zotuo; puoe mhapuorei jü ro, puo rügu la puo zewatuo.

² Kerügumia puoe mia ki rhie le ba ngulie, sidi puo vükhriwata ro, süu pie kedukhri tholie lho;

³ derei niakithu parketa sieta ro, süu pie mia kedukhri thotatuo.

⁴ Rügukelie khunuou puo dzie nu rhei ba ngulie ro, puo thuo thudo, morei gada, morei tekuo shierei, puoe puo de kenie pie sutuo.

⁵ Mia puoe puo kiri bu lie morei khubelie puo cüwata, morei puo kiri phreishü di kekreimia puo lie cüwa ro, puoe puo lie morei puo khubelie kevithora nu thesu chü latuo.

⁶ Mi tu par di zohunha pepfülie di telha repiekezhü morei telha puobo gei keba morei lie thewa ro, mi thukeshüu bu thesu chü tseituo.

⁷ Mia puoe raka morei mhanya pie puo zanuou dzie nu banu di peleshü, mu themia süu kinu mia bu süu rügulieta di kerüguu ngulieta ro, süu bu süde kenie sutuo.

⁸ Mhanuü kerüguu ngulie mota ro, ki niepuu ze Kepenuopfü mhodzünu vor di puoe puo zanuou vieko bielieta mo mo shikecü pfhütuo.

⁹ Kehoupuorei thedo nu thudo, gada, tekuo, pfhemenei la niepu kesuta morei mha pejükewa pevie di sie, “Hau a vie tou zo,” iphreta ro; unie nyie se Ukepenuopfü mhodzünu vortuo; Kepenuopfü puo pejoketau bu se kenie pie kekreiu sutuo.

¹⁰ Mia puoe puo gada, thudo, tekuo morei khunuo kehoupuorei pie puo zanuou bu peri thanushü, mu miapuorei ngu mo di, süu siata morei rüzalie morei tepietata ro,

¹¹ Jihova mhodzü nunu rüse puo pie ba di unie bu unie nyieu pepituo; sidi khunuo niepuue kekreiu rüse rünyülieta ro thesu khashü motatuo.

¹² Derei süu puo rügulieta ro, puoe thesu pie khunuo niepuu tsütuo.

¹³ Mhanuü khunuo bu kiri süu ciechücierhawata ro, puo bu zhapu la kesia chü süu pie vorlie, sitse ciechücierhakewau la puoe thesu sulie lho.

¹⁴ Mia puoe mia kiri puo thepulie, mu puo niepuu puo ze tuo mo di süu bie kerüzawa, morei pesiawa ro, puo bu thesu chü tseituo.

¹⁵ Puo niepuu puo ze tuo di ro, puo bu thesu chülie lho, puo khunuo süu nyie se ro, süu nyieu la we sushütuo.

Kelhou mu Nanyü Zhoko

¹⁶ Mia puoe rüü phousepfü puo vakha moluokecüpfü puo seketsilie, di puo zezhüwa ro, puo bu süpfü la thema khashü di süpfü bu puo kimia chütatuo.

¹⁷ Puo puoe süpfü khashü mvüta ro, puo bu rüü phousepfü la thema zho de khashütuo.

¹⁸ Nie bu themoumiapfü perheipie tuolie lho.

¹⁹ Kehoupuorei khunuo ze zhükecüu pie kesia nu shütuo.

²⁰ Kehoupuorei Jihova rübei mo di terhuo kekrei ki ruosuo kechümia peka lotsowatuo.

²¹ Nie donu lhoutuoketa solhimia gei puotou kemo morei u pesekecü chü lho, nie rei Ijipt kijü nu chazoumia chü lhoukecü la.

²² Nie samimiapfü morei merünuomia pechüpenyü lho.

²³ Nie uko pechüpenyü di uko a ki rükhruoshü ro, ae uko rükhruokeshü rünyü tou zotuo;

²⁴ sidi a noupfhü tu partuo, mu a zhiecha pie nie dukhriwatuo, sidi nie nupfünuo bu samimiapfü chütatuo mu nie nuonuo bu merünuomia chütatuo.

²⁵ Nie raka pie a themia nie donu keba kejümia thepushü ro, no raka pie mia pecayakecümia tuoita lho, mu no puo ki puopra merü lho.

²⁶ Thepu puo la n zanuou pfhe pielie üro, niaki leta kemonu pie puo tsü lawalie;

²⁷ puo kewhe süyo zocü la. Puo mo wheketuo pfhedzie süyo zo üro süu dzie mo di kimhie zhülie ta? Siro puo a ki rükhruoshü ro, ae rünyü zotuo; ae a noushünouzhie nyicü la.

²⁸ Noe Kepenuopfü kerhie lho, morei nie kekhayakezhau rüse lho.

²⁹ Noe n lieyie ketshukelhuo chü mu n khubedzü tshuzie keba nunu mha khashü menyhota lho. Noe n nuo thepfu nuorieu pie a tsütuo.

³⁰ Noe n thudo mu n kuoko rei pie sükemhie chütuo; zha thenie puo bu puo krüpfü ze thalie; zha thetha nhie no pie a tsüwatuo.

³¹ Nieko chü kemesapie a tsüwaketa themia kro puo chütuo; süla nieko khunuo bu terha nu ciechücierhawaketa chü puorei cülie lho, niekoe süu kelhoupie tefüko tsüwatuo.