Toukepra 21 - Angami Naga CL (Re-edited) Bible (BSI)

Miadiemia gei Chü Kezhüu

¹ Tsie no thezho hako pie uko mhodzünu shüshülie:

² No Ibrimia kedie puo khrü ro, puo bu cie sorou n theketuo, mu cie thenie cie puo kekha jü di khashüwatuo, puo rhakecü chü lho.

³ Puoe puo rübei vor ro, puo rübei di pratuo; puoe thenu lie ze vor ro, puo kimia rei puo ze pratuo.

⁴ Mhanuü puo niepuue thenu lieshü puo tsü mu puo nuo thepfu morei thenu penuoshü puo tsü ro, puo kimia mu puo nuonuoko puo niepuu vietatuo, mu puo rübei pratuo.

⁵ Derei kedieu sie, “A a niepuu, a kimia mu a nuonuoko ngu a nei; a tuota nyü mo,” idi puta ro,

⁶ süsie puo niepuue puo ze Jihova ki vortuo, mu puo ze kikhau morei kikhaco-u ki vortuo; sitse puo niepuue thegi kemethe puo pie puo nyie geshütuo; sitse puoe puo rhei chie puo lie chütatuo.

⁷ Mia puoe puo nuopfü zepie kedie nu shü ro puoe kedie thepfumia tuoi di tuo pralie lho.

⁸ Puo niepuue puo thuo puo la puo vakhalieta, di hapfüe puo niepuu nei chülie moro, hapfüe puo thuo puo rha latuo; puoe hapfü pie rüna kekreimia ki zelie kevi puo mezhü tuolie lho, puoe puo pie kezhasewaketa la.

⁹ Puoe puo nuou la hapfü vakhalie ro, puo pie puo thuo puo nuopfü tuoitatuo.

¹⁰ Puoe thenu kekrei puo lie lalieta ro, puoe hapfü caüva, puo pfhenei mu mianupfünuo kechü mezhüko puorei bie petsawalie kenjü.

¹¹ Mhanuü puoe mhaca se hako hapfü la chüshü moro, hapfüe mhapuorei khashülie lho, mu shükeiraka pie su mo di tuotalie vi.

Kesuo Kechümia la Thezhoko

¹² Kehoupuorei mia vüshü di süu siata ro, puo bu rei siatuo.

¹³ Derei puoe puo kenyü chü di chü mo, sirei Ukepenuopfü thuo pie puo dzie nu shüta ro, ae puo bu themou chü ta volie kevi thechü puo khapie n tsüshütuo.

¹⁴ Derei mia puoe kecürüdo se puo kenyü chü di mia kekreimia puo dukhri ro, puo bu siaketuo la, noe a ruosuoba geinu puo zetatuo.

¹⁵ Kehoupuorei puo puo morei puo zuo vü ro, puo bu sia zotuo.

¹⁶ Kehoupuorei themia rügu ro, süu zewata zorei morei süu ze tuo di ngulie zorei, puo bu sia zotuo.

¹⁷ Kehoupuorei puo puo morei puo zuo rüsekecüu pie kesia nu shütuo.

¹⁸ Mia kenie kegei di mia puoe ketsie pie kekreiu va morei puo duthe pie vüwa, mu puo siata mo, derei puo zhü nu zhüta.

¹⁹ Sidi themiau la sie puo the pie di cha tuo rühoulie ro, mia kevüu bu mesatatuo, puo bu puo thekekecü la puotei pevokeshüko mu puo theke keshürho lotsokeshüko la sukecü rübei zotuo.

²⁰ Mia puoe seita pie puo dieu morei puo diepfü vüshü di puo dzie nunu siata ro, puo bu siazha ngutuo.

²¹ Derei puo dieu morei puo diepfü zha puo kenie rhei balie ro, puo bu siazha chülie lho; puo dieu sü puo vietakecü la.

²² Mia huo kegei sie di, thenumia nuonikepfü pfü puo bie pechüwa, sidi puo nuo krüta, derei mha kekrei kesuo vor sa moro, puo bie pechükewau bu, thenupfü nupfuue pie puo gei keshü tuoi sutuo; mu puoe capiko thokeshü nu khashütuo.

²³ Mha kesuo huo vorta ro, noe thephou sou thephou khashütuo,

²⁴ themhi sou themhi, thehu sou thehu, thedzie sou thedzie, thephi sou thephi.

²⁵ Mi kethe sou mi kethe, rüza sou rüza, kevü sou kevü ituo.

²⁶ Mia puoe puo dieu morei puo diepfü mhi vüshü di vü pesuowa ro, puoe themhiu la puo dieu khashüwatuo.

²⁷ Puoe puo dieu morei puo diepfü hu jophewa ro, puo huu la puo dieu khashüwatuo.

²⁸ Thudo puoe thepfumia morei thenumiapfü puo thukhriwa ro, ketsie pie thudo-u vakhriwatuo, mu puo chü cülie lho; derei thudo niepuu la we mesa zotuo.

²⁹ Derei thudo-u thiedzü rei mia thukecü puo zho ki chüya, mu hau pie puo niepuu pesiwata, derei puo süu khapie balie mo di mia thukhriwa ro, ketsie pie thudo-u vakhriwatuo mu puo niepuu rei pie kesia nu shütuo.

³⁰ Derei kesiau kikru thesu puo pie themiau gei shü ro, puo phouu rhalieketuo la, puo gei mhakehoupuorei khakeshüu, puoe süu khashü morosuo.

³¹ Thudo-ue khriesanuomia morei thenunuomia puo thukhriwa ro, thezho hau pie puo gei shütuo.

³² Thudo-u kediemia thepfu morei thenu shierei, thukhriwa ro, thudo niepuue rakachü shekel ser pie kedie niepuu tsütuo, mu ketsie pie thudo-u vakhriwatuo.

³³ Mia puoe kheho puo whe mo ba, morei kheho puo hoshü di whe mo ba di, thudo morei gada puo bu te sünu leta ro,

³⁴ kheho niepuue süu sutuo; puoe raka pie khunuo niepuu tsütuo, mu khunuo kesiau puo vietatuo.

³⁵ Mia puo thudoe kekreimia puo thudo thukhriwa ro, unie thudo kerheiu zelie di puoma kezatuo; mu thudo kesiau rei kezatuo.

³⁶ Morei thudo-u thiedzü rei mia thuthukecü puo zhoki chü sei tuota, sidi puo niepuue puo khapie balie moro, puoe thudo sou thudo pie sutuo, mu khunuo kesiaue puo vietatuo.