Toukepra 20 - Angami Naga CL (Re-edited) Bible (BSI)

Thezho Kerko

¹ Sitse Jihova die hako pete pu di sie:

² Ae Jihova n Kepenuopfüu, Ijipt kijü nu, kedie kechü ki nunu n ze parkelieu.

³ Noe a kemo terhuo kekrei puorei nyilie lho.

⁴ No n thuo n la miarhi chülie lho, süu tei pesogei keba, morei sükhro kijü keba, morei kijü khro dzü nu keba kehoupuo mhiecü rei rhilie lho;

⁵ no nuketsu süko rüsuo, kelu morei uko lie chülie lho; ae Jihova n Kepenuopfü, puo rokenyi Kepenuopfü puocü la, u krünuo kephouma la mu a meliekewamia nuonuo gei phou se phou dia ketso rei phituo;

⁶ derei a khrie mu a diekhakeshüko zeyakezhamia gei we rüdi kemo kekhrie pie thephou thenyie ketso rei pekieshüya.

⁷ No kemethuo nu Jihova n Kepenuopfü za selie lho; Jihovae kemethuo nu puo za sekecümia pejo motalie lhocü la.

⁸ Sabat zhau rükralie, di süu se kemesalie.

⁹ No zha sorou mhachü di n mhatho pete chütuo;

¹⁰ derei zha thenie nhie we Jihova n Kepenuopfü la sabat, sünhie no mhatho puorei chülie lho, no rei n nuo thepfu rei thenu rei, n theke thepfu rei thenu rei, n kiri rei, morei n cahou nu keba solhimia rei,

¹¹ Jihova zha sorouko nu tei mu kijü, dzükezha mu sünu keba pete chükelie la, sidi zha thenie nhie rüleilie; sidi Jihova japie sabat zhau gei shü mu süu se kemesalie.

¹² N puo n zuo rhulie, Jihova n Kepenuopfü pie n ketsü kijüu nu n kelhouzha bu chalieketuo la.

¹³ No mia dukhri lho.

¹⁴ No pieü chü lho.

¹⁵ No rügu lho.

¹⁶ No n zanuomia gei ketijü zhapu chü lho.

¹⁷ N zanuou ki mehou lho, no n zanuou kimia mehou lho, morei puo theke thepfu rei thenu rei, morei puo thudo, morei puo gada, morei n zanuou vie puorei mehou lho.

¹⁸ Tsiu themia peteko teikese, teikemela, ketsü pfhe mu kijüthou khu keba ngushü tse, ukoe michie di peta; mu ukoe ratsa thata,

¹⁹ mu Mosa ki pu di sie, “No hie ki mha pushülie, hie thuo rünyülietuo; derei Ukepenuopfü bu we hie ki mha pu hiecie, hie siata rei si lhomu.”

²⁰ Sitse Mosae themiako ki, “Michie hiecie, Ukepenuopfü nie dojütuo üdi vor zokecü la, siro puo preikecüu bu nie nou ki balie, nie bu kephouma chü molieketuo la.”

²¹ Mu Mosae Ukepenuopfü bakecü kimhou zeibouikecüu penuo phikecü ki themiakoe ratsa tha.

Ruosuoba la Thezhoko

²² Siro Jihovae Mosa ki: No Israelko ki hakemhie pushülie: “A teigei nu nieko ze kerüchükecü nieko thuo ngushüte.

²³ Niekoe rakachü pie terhuorhiko chüpie a ze balie lho, morei nie thuo nie la suna pie terhuorhi chülie lho.

²⁴ No a la rünyo pie ruosuoba puo chülie, di sü geinu n kuoko mu n thuko pie kethe ruosuo mu n vitho ruosuo chülie; thechü kehoura rei a zau rükraketuo chükeshüra, ae vor di japie n tsütuo.

²⁵ Siro noe a la ketsie pie ruosuoba puo chü ro, ketsie kephro pie chü lho; noe n nya n ra pie süu bie ro no süu perhuwata zo.

²⁶ Mu noe chapra geinu a ruosuoba gei kho di n kemethuo pie mia pengu lho.”