Toukepra 2 - Angami Naga CL (Re-edited) Bible (BSI)

Mosa Penuokelie

¹ Siro Levi kinumia puo pra di Levi nuomiapfü puo lielie.

² Thenupfüe nuonipfülie di thepfunuomia puo penuolie; mu hapfüe unuoyo zivikecü ngulie tse khrü se puo keviese bata.

³ Sidi puo kevie salie kenjüta tse, puo la tekhrierha puo pfhülie, di alakatar mu seitsa pie süu nyhülie; sidi unuoyo pie sünu shülie di süu pie kerü khie tekhrie donu shüwa.

⁴ Mu puo pie kedipuo chüwatuo shikecü sishütuo üdi puo üpfü bu kepecie nu tha.

⁵ Süki Faro nuopfüe dzü rülutuoü kerü nu tsur, mu puo zetuopfüko kerü khie rühou tuo; ru puoe tekhrieko donu merhau zhükecü ngulie di süu chüpie phirnu di puo zetuopfü ketseshü;

⁶ sidi puoe süu hieshü ru unuoyo ngulie; mu harie; unuoyo sü krazhü. Sitse puoe unuoyo ngu puo noumezhielie di sie, “Hayo sü Ibrimia nuo puote.”

⁷ Sitse puo üpfü Faro nuopfü ki, “A bu vo unuoyo thekepie n tsüketuo la Ibrimiapfü donu nuozemiapfü puo kie ze vortieya me?”

⁸ Sitse Faro nuopfüe puo ki, “Vocie,” si. Süla thenupfü vo unuoyo zuo kieshü.

⁹ Sitse Faro nuopfüe puo ki, “Nuo hayo ze volie, di puo thekepie a tsücie, siro a n zha chüshü n tsütuo,” si. Süla thenupfü unuoyo zelie di puo thekelie.

¹⁰ Mu unuoyo memielie, sitse puoe unuoyo ze Faro nuopfü ki vorshü tse puoe pie puo nuo chüta; siro puoe puo zapie Mosa chü, mu puoe sie, “Kekreilamonyü a dzü nunu puo shü parkelie la.”

Mosa Ta Midian nu Kevo

¹¹ Mosae phichülie tse, khunhie puo puo themiako ki kho di uko pie kemesiko mehoshü; mu puoe Ijiptmia puoe puo themia Ibrimia puo vüketha ngu.

¹² Puoe lutsahatsa mehoshü, mu miapuorei ngu mo ru puoe Ijipt-u dukhriwa; di huocanyo nu puo keviewa.

¹³ Süsienhie puoe re pra ru; harie, Ibrimia kenie keze keshü tha; ru puoe kekrükecüu ki, “No kiüdi n ze Ibriu vüya ga?”

¹⁴ Sitse puoe sie, “Supuonie n bu hie mho kedi mu capimia chüshü ga? No Ijipt-u dukhrikewa tuoi a dukhriwa nyüya me?” Sitse Mosae michie di, “Mha hau mia si tou bate,” icü lelieta.

¹⁵ Siro Faroe süu sishü tse, Mosa dukhrikewa leta. Derei Mosae Faro kinu tata di Midian kijü nu bata; mu puoe dzükhou puo khieki balie.

¹⁶ Siro Midian nu zievo-u puo nuo thenumia thenie ba; mu uko vor di dzüü, siro uko puou kuoko bu krieketuo la dzü pie dzükriebouko nu rei shüshü.

¹⁷ Sitse Tekuokepfheko vor di uko whuowa; derei Mosae siethalie di uko khruohishü, di dzü pie uko kuoko tsüshü.

¹⁸ Ukoe uko puo Reuel ki vor tse, puoe sie, “Kimhie di thie nieko vor zi haita ga?”

¹⁹ Sitse uko sie, “Ijiptmia puo tekuokepfheko dzie nunu hieko shüphrashülie, mu hieko la dzü rei üshü di hieko kuoko dieshü.”

²⁰ Sitse puoe puo nuopfüko ki, “Siro puo kirapuo ba ga? Nieko kiüdi themiau khawa ga? Puo kieshülie, puo bu niekhrüda cülieketuo la,” sita.

²¹ Mu Mosa rei themiau ze baketuo puo neilie, mu puoe puo nuopfü Zipora pie Mosa tsüshü.

²² Puoe thepfunuomia puo penuoshü, puo za thopie Gershom chülie, kekreilamonyü puoe sie, “Ae mia kijü nu rüsomia chü di lhou,” ikecü la.

²³ Zha kekra sie Ijipt kediu siata. Siro Israelmiakoe miadie chü di meheimelozhü zo, sidi kekhruohi cha, sitse uko kedie kechü la rükhruokeshüko Ukepenuopfü tsolie.

²⁴ Siro Ukepenuopfüe uko meheimelokeshüko sishü tse, Ukepenuopfüe Abraham, Isak mu Jakob ze dietseidiekho pie ketuou rükralie.

²⁵ Siro Ukepenuopfüe Israelko mehoshü, sidi Ukepenuopfü uko rüli leshü.