Toukepra 19 - Angami Naga CL (Re-edited) Bible (BSI)

Israelko Sinai Kijüthou gei Vorkelie

¹ Israelko Ijipt nunu praketa sie khrü seu nu, Sinai rayha nu vorlie.

² Mu ukoe Refidim nunu tuoshü di Sinai rayha nu vorlie tse, ukoe kijüthouu mhodzütsa nu razhü chülie.

³ Mosae Ukepenuopfü ki kho, mu Jihovae kijüthou geinu puo kie di sie, “No Jakob kinuko ki hakemhie pushücie, mu Israelmiako ki pushülie.

⁴ A Ijiptmia gei kedipuo chüshü shikecü, mu a kikidi tsüü shü geinu nieko pfü a ki vorlie shikecü niekoe ngushüte.

⁵ Süla tsie, nieko a pfhe rünyü mu a diekhakeshüko zetuo üro, themiako pete donu niekoe a vie chü pekreilietuo; kekreilamonyü kijü pete a vie,

⁶ mu nieko a la kedi zievoko mu kemesa seyie puo chülietuo. Die hako no pie Israel nuonuoko ki pushülie.”

⁷ Süla Mosae vor di themiako donu phichüko kielie, di Jihova puo ki diekhakeshü dieko pete pie uko mhodzünu shü.

⁸ Mu themia peteko keze di, “Hie Jihova pukeshü pete chütuo,” idi pushü. Sitse Mosae themiako die pie Jihova ki pushü.

⁹ Siro Jihovae Mosa ki, “Harie, a kimhou shüde-ikecü puo nunu n ki vorzhie, themiako bu a n rüchükecü silie di kechachie n pelelieketuo la.” Sitse Mosae themiako dieko pie Jihova ki pushü,

¹⁰ ru Jihovae Mosa ki, “Themiako ki vo di uko bu thie mu sodu uko chü kemesalie, siro uko bu uko pfheneiko menyiwalie,

¹¹ mu zha se nhie dojülie; zha se nhie Jihovae themia pete mhingu nu Sinai kijüthou gei tsurketuo la.

¹² Mu no themia lutsahatsa kebako la riehou puo chülie, di uko ki, ‘Kijüthou gei kho molieketuo morei puokhie bie molieketuo la menuoliecie; kehoupuorei kijüthouu kebiemia sia zotuo.

¹³ Thedzie puorei bu süu nyü lho, ketsie pie puo va morei theü pie pekhriwatuo; khunuo morei themia shierei, puo bu rheilie lho.’ Ketsüu khou petoshü tse, uko bu kijüthouu gei khorlie.”

¹⁴ Süla Mosae kijüthou geinu themiako ki kerlie, sidi u chü kemesalie; mu uko bu u thuo u pfheneiko menyiwa.

¹⁵ Siro puoe themiako ki, “Zha se nhie la dojü balie; vo thenumia penuo hie.”

¹⁶ Zha se duü teise, teimela, mu kimhoushü soukecü puo kijüthou zepfü bata, siro ketsü puo khou peto se sashü tse, themia razhüchü nu keba pete peta.

¹⁷ Süsie Mosae Ukepenuopfü ze keseketuo la razhüchü nunu themiako ze par; mu ukoe kijüthou phi nu thalie.

¹⁸ Mu Sinai kijüthouu mikhu thuo puo zepfülie, Jihova mi nunu sügei kercü la; tsiu mikhu süu miphu puo nunu mikhu khu kesie tuoi, khurüdzi sieta, mu kijüthou pete rünieta.

¹⁹ Siro ketsü pfhe meyie miemieketa ki ze Mosae die pushü ru Ukepenuopfüe teikese nunu puo die kelashü.

²⁰ Siro Jihovae Sinai kijüthou gei tsur; mu Jihovae Mosa bu kijüthou tsüle gei khonu di puo kie, mu Mosae sügei kho.

²¹ Sitse Jihovae Mosa ki, “Tsu di themiako tarhowalie, ukoe Jihova mehotuoü vaphapfü le di mia kekra siata rei si momu.

²² Siro zievoko Jihova penuo vorketuoko bu rei u chü kemesalie, si moliro Jihova uko gei rei phituo.”

²³ Sitse Mosae Jihova ki, “Themiakoe Sinai kijüthou gei khorlie kenjü, kekreilamonyü no n thuo hie ki diekhashü, di sie, ‘Kijüthou gei puo riehou chüwa di se kemesalie’ ite.”

²⁴ Sitse Jihovae puo ki, “Kelie, di Aron bu n ze khorlie; derei zievoko mu themiako bu Jihova ki khotuoü pfüpha ler hie, puo uko gei phita rei silie lhomu.”

²⁵ Süla Mosa ke di themiako ki pushü.