Toukepra 18 - Angami Naga CL (Re-edited) Bible (BSI)

Jethro Mosa ki Kevo

¹ Jethro, Mosa meiue Midian zievo-u Ukepenuopfüe Mosa mu puo themia Israelko gei mhachükeshü, kikemhie di Jihova Ijipt nunu Israelko ze parlie shikecü pete sishü.

² Mosa meiu Jethroe Mosa kimiapfü Zipora, Mosa puo ketsekewapfü,

³ mu puo nuonie zelie, mia puo za Gershom (puoe “A mia rüna nu solhimia puo chü,” idi pukecü la.)

⁴ Mu kekreiu za Eliezer (Puoe, “A puo Kepenuopfü sü a kekhruohiu, sidi Faro zhiecha nunu a shüphralie” idi pukecü la.)

⁵ Siro Mosa meiu, Jethro sü Mosa nuonie mu puo kimia ze di rayha nu Mosa ki vor, puoe Ukepenuopfü kijüthou khieki razhüchü nu vor.

⁶ Puoe dielie ketsepie Mosa tsü di, “A n meiu Jethro, a n kimia mu n nuonie ze di n ki vorzhie.”

⁷ Mosae puo meiu ze kesetuoü pra, sidi puo nuketsu puo kelu di puo meboshü; siro unie huoniehuo rüli ketso, sidi pfhekiu nu leta.

⁸ Sitse Mosae puo meiu ki Jihova Israel la Faro gei mu Ijiptmiako gei kedipuopuo chüshü shikecü, mu cha nu uko mha kere dzükelie nu, kimhie di Jihovae uko shüphralie shikecü pete pushü.

⁹ Mu Jethroe Jihova Israel gei mha kevi pete chükeshü, süusü puo Ijiptmiako dzie nunu uko shüphrakeshü la puo nei phita.

¹⁰ Sitse Jethroe sie, “Jihova tsheliecie, Ijiptmia dzie nunu mu Faro dzie nunu nieko shüphrakeshüu.

¹¹ Tsie we a Jihova terhuo kekrei pete ki zhakuokecü siliete, kekreilamonyü puoe Ijiptmiako uko gei kelhie phi keba nunu uko ze parlieketa silie.”

¹² Sitse Mosa meiu Jethroe kethe ruosuo puo mu ruotho chüpie Ukepenuopfü tsü; siro Aron-e Israelmia phichü pete ze vo Ukepenuopfü mhodzünu Mosa meiu ze niekhrüda cü.

Capiko Kedakelie

¹³ Süsienhie Mosae capi chü themiako nyie kecütuo üdi balie, mu themiakoe khise nu vo thevatie ketso Mosa houpfü tha tso.

¹⁴ Mosa meiue puoe themiako la mhachü keba pete ngushü tse, puoe sie, “No themia hako la mhachü keba hau kedipuo mu? No kiüdi n rübei ba, mu themiako pete bu khise nunu vo thevatie ketso n houpfü thaya mu?”

¹⁵ Sitse Mosae puo meiu ki, “Themiako Ukepenuopfü ki mha ketsotuo üdi a ki voryacü la;

¹⁶ uko dienya puo ba ro, uko a ki vorya mu ae mia puo mu kekreiu unie donu theca chüya, sidi ae Ukepenuopfü zhoko mu puo mharhüko se uko pesishüya.”

¹⁷ Mosa meie puo ki, “No chü kebau vi mo.

¹⁸ No mu n ze keba themiako nieko thuo nieko bie pelhowatuo, mhatho hau n la mesithor; n rübei hau chükeliepfü mo.

¹⁹ Tsie a pfhe rünyülie; a mharhüshü n kietuo, mu Ukepenuopfü bu n ze balie! Noe themiako sou nu Ukepenuopfü mhodzü thalie, sidi uko bu u dienyako se Ukepenuopfü ki vorlie;

²⁰ noe thezhoko mu mha pepikelieko pie uko pethashülie, di uko bu medzi morokesuoko chau mu chü morokesuou silie.

²¹ Sizomonyü themia pete donu mha selie kevi, süu Ukepenuopfü kepreimia, pelelie kesümia mu theso rütseyakecümia kedalie; di themia süko pie themiako mho shü di uko bu mia nyie puo, krie puo, hiepengou mu mia ker kekhakecü chülie.

²² Sidi uko bu puotei pete nu themia nyie kecütalie; thenyie kereko uko bu se n ki vorlie, derei thenyie kerüüko uko thuo pepiwalie, sitse süu n la rüükuotuo, mu ukoe n ze thepieu pfülietuo.

²³ No hau chülie, mu Ukepenuopfü rei diekhashü n tsü ro, noe hielietuo, mu themia pete rei unou mene di u thuo u chü nu votatuo.”

²⁴ Süla Mosae puo meiu pfhe rünyülie, di puo pukeshü pete chülie.

²⁵ Mosae Israel pete nunu themia mha selie kevi kedalie, di uko pie themiako mhokezha chüshü, mia nyie puo, krie puo, hiepengou mu mia ker kekhakecü chüshü.

²⁶ Mu uko puotei pete nu mia nyie kecü; ukoe thenyie kereko se Mosa ki vor, derei thenyie kecü pete uko thuo pepiwaya.

²⁷ Süsie Mosae puo meiu bu tuota, mu puoe tuo puo ra la vota.