Toukepra 17 - Angami Naga CL (Re-edited) Bible (BSI)

Tsiekrie geinu Dzü Kru Kepar

¹ Israelmia mechükehou pete Jihova diekhakeshü ki ze, Sin rayha nunu rülili di rüyie vor Refidim nu uko razhü chü chülie; derei sünu themiako bu krieketuo dzü ba mo.

² Süla themiakoe Mosa gei panya di puo ki, “Dzü krieketuo khashü hie tsücie.” Süla Mosae sie uko ki, “Kiüdi nieko a pejoya ga? Kiüdi nie Jihova medophiya ga?”

³ Derei themiakoe sünu terhü di dzü krie nyülie, sidi Mosa gei panya di sie, “Kiüdi no Ijipt nunu hieko ze par di, hieko nuonuoko mu hie khuriko bu terhü di siatatuo üya ga?”

⁴ Süla Mosae Jihova ki shie di sie, “A bu themia hako pie kedipuo chü ta? Uko ketsie pie a va kemoyo zote.”

⁵ Sitse Jihovae Mosa ki, “Israelmia phichüko huo zelie di themiako mhodzütsa philie; mu n dzie nu no kethe se Nail rü vükeshüu theze selie.

⁶ Harie, a Horeb nu tsiekrieu gei n mhodzünu thatuo. Noe tsiekrieu vüshütuo mu süu nunu dzü partuo, themiako bu krielieketuo la.” Ru Mosae Israel phichüko mhinguki nu sükemhie chüshü.

⁷ Siro puoe thechüu pie Massa mu Meriba chülie, kekreilamonyü Israel nuonuokoe mia gei panyapara mu ukoe “Jihova u donu tuo mo me?” idi Jihova medophikecü la.

Amalekko Israelmia Lhoketa

⁸ Süsie Amalekko vor di Refidim nu Israelko ze kegei.

⁹ Sitse Mosae Joshua ki, “Úko la themia kedalie, sidi pra Amalekko ze kegeicie; sodu a a dzie nu Kepenuopfü theu selie di kijükhruu tsüle gei thalietuo.”

¹⁰ Süla Joshuae Mosa puo ki kepu tuoi chülie, di Amalekko ze kegei; siro Mosa, Aron, mu Hur uko kijükhruu tsüle gei kholie.

¹¹ Mosae puo dzie yhapie ketha ki, Israelko kuolie mu puoe puo dzie pie kerünuoketa ki Amalekko kuota.

¹² Derei Mosa dzie mezieta; süla ukoe ketsie puo pielie di süu pie puo khro shüshü, mu puoe sügei balie, siro Aron mu Hur unie mia puo puo dzie tietsa puopuo mengu pielie, sidi niaki kele ketso puo dzie bu metei balie.

¹³ Sidi Joshua bu zhiecha süu pie Amalek mu puo themiako penyüwa.

¹⁴ Siro Jihovae Mosa ki, “Rükra tuolieketuo la hau thupie leshüda puo nu shülie sidi Joshua kesi kinu phrüshülie; Amalekko kerükra ae tei khro nu bie pejü lotsowatuo.”

¹⁵ Sitse Mosae ruosuoba puo chülie di süu za pie, Jihovae a pfhelhau, idi tholie,

¹⁶ puoe pu di, “Jihova pfhelhau la thedzie puo ba! Jihova thephou pete nu Amalek ze kegeituo.”