Toukepra 16 - Angami Naga CL (Re-edited) Bible (BSI)

Jihova Manna Perükeshü

¹ Israelmia kro-u pete Elim nunu tuoshü, sidi uko Ijipt kijü nunu tuokeshü sie khrü kenieu khrü zha kerepengou nhie Sin rayha, Elim mu Sinai unie donu kebau nu vorlie.

² Mu Israelmia kro-u pete rayha nunu Mosa mu Aron unie gei panyata.

³ Sidi unie ki, “Hie bu Ijipt nu themuo li khieki ba di niekhrüda cü pevü ba di Jihova dzie nu siaketau vikuo, derei nnie hie ze par rayha hau nu shü di themia kro-u pete bu khe siatatuo üzhie.”

⁴ Süsie Jihovae Mosa ki, “Harie, ae teigei nu nieko la niekhrüda perüshütuo; sidi themiako bu teisonhie pra di khunhiekhunhie va touu pfhü kengutuo, ukoe a thapie kiekeshüu nu tuotuo mo lho shikecü a bu uko rüli silieketuo la.

⁵ Zha sorou nhie, ukoe se kevorko pie mha kesekecü ki, ukoe teisozha kekreiko nu de kenietatuo.”

⁶ Süla Mosa mu Aron unie Israelmia peteko ki, “Ijipt kijü nunu nieko ze parkeshüu Jihova zo ücü niekoe thevatie silietuo,

⁷ mu niekoe khise Jihova zapuzayieu ngulietuo, kekreilamonyü puoe nieko Jihova gei panya bakecü site. Nieko hienie gei panya ba zorei, hienie sü kedipuo mu?”

⁸ Sitse Mosa la sie, “Jihovae thevatie nieko bu cüketuo la, themuo mu khise ro niekhrüda pie nie tsüshü ba, kekreilamonyü Jihovae nieko panya di puo petsou keba site. Hienie sü kedipuo mu? Nieko panya keba ha hienie petsou ba mo derei Jihova petsou ba zo.”

⁹ Siro Mosae Aron ki, “Israelmia mechükehou pete ki, ‘Jihova mhodzünu penuo vorlie, puoe nieko panya keba siwaketa la’ ishülie.”

¹⁰ Siro Aron-e Israelmia mechükehou ki pushü, mu ukoe rayhatsa mehoshü, ru Jihova zapuzayieu kimhou geinu ngu par.

¹¹ Sitse Jihovae Mosa ki pu di sie,

¹² “A Israelko panya keba sishüte; uko ki pushülie, ‘Teizei merü keler ki nie themuo cü pevütuo mu khise gei nie niekhrüda nie kelhuo ngulietuo; sitse nie-e a Jihova nie Kepenuopfü ücü silietuo.’ ”

¹³ Thevatie ler tse vüpfhi vor razhüchü tshulie, mu khise gei thezei thuo razhüchüu houpfü zhülie.

¹⁴ Siro thezeiu soketa ki, rayha mhogei mha kememhie puo kijü mhogei thezei kemhiei zhülie.

¹⁵ Israelmiakoe süu ngu tse, ukoe huoniehuo ki, “Hau kedipuo ga?” Ukoe süu kedipuo shikecü si kemo la. Süla Mosae uko ki, “Hauha Jihovae nie bu cünu di khakeshü niekhrüdau we.

¹⁶ Jihovae hakemhie di diekhashü: ‘Süu kengulie, nie kehoupuorei puo thuo cülie kevi de le di; puo pfheki nu keba themia tsüphrü medzi di mia puo la omer puopuokecü kengulie.’ ”

¹⁷ Israelmiakoe sükemhie chülie, ukoe huomia tsa, huomia kra idi kengulie.

¹⁸ Derei uko omer se süu mejü sie ru pa kengu krakelieu rei tshu kezie chü mo, mu kengu petsakecüu rei tso kemo chü mo; mia puoe puo thuo cülie kevi de kengungu zo.

¹⁹ Sitse Mosae uko ki, “Mia puo bu rei süu yopuorei khapie ba khise tso hie,” sishü.

²⁰ Derei uko Mosa die rünyü mo; sidi huomia süu huo khapie ba khise tso, sitse sünu pesa leta di suota; sidi Mosa bu uko gei puo nei mota.

²¹ Teisoduü ukoe mia puopuo thuo cülie kevi de pa kengu; derei niaki le parta ro, süu zetataya.

²² Zha sorou nhie ukoe va kenie ca kengulieya, mia puo la omer kenienie; mu mechükehou nu krütako vor di Mosa ki pu,

²³ sitse puoe uko ki, “Jihova diekhakeshüue hakemhie: ‘Sodu kerüleizha ketho puo, Jihova la sabat kemesau; no rie nyü kebau rielie mu cha nyü kebau chalie, mu sükezieko khapie ba khise tsolie.’ ”

²⁴ Süla ukoe Mosa uko ki kepu tuoi khapie ba khise tso; mu süu suota mo mu pesa leta mo.

²⁵ Mosae sie, “Thie we hau cülie, thie Jihova la sabat puokecü la; nieko thie lie nu hau ngulie lho.

²⁶ Zha sorou nieko hau patuo; derei zha thenie sabat nhie, puo rei bu balie lho.”

²⁷ Zha thenie nhie themia huo pa kengutuoü pra, mu puo rei ngulie mo.

²⁸ Sitse Jihovae Mosa ki, “Nieko kichiepuo a diekhakeshüko mu a pukeshüko ze mvü batuo mu?

²⁹ Mehocie! Jihova sabat pie nie tsüshü; süla zha sorou nhie puoe zha kenie ca pie nie tsüshüya; nie kehoupuorei nie chü nu balie, mia puo bu rei zha thenie nhie puo chü nunu pra hie.”

³⁰ Süla themiako zha thenie nhie rüleilie.

³¹ Siro Israel kinuko süu za pie manna tholie, süue koriander tsia mhiei, kra, mu süu cüsie ro mepfhidzü pie kechü niekhrüdapfü puo mhiei.

³² Siro Mosae sie, “Jihova diekhakeshü hamhie: ‘Hapfü omer puo pie nie thephou pete nu khapie tuolie, sitse ukoe a Ijipt kijü nunu nieko ze kepar ki a rayha nunu se nie vakechü niekhrüdau ngulieketuo la.’ ”

³³ Siro Mosae Aron ki, “Lipfhü puo pielie, di manna pie sünu shülie, sidi pie Jihova mhodzünu balie, nie thephou pete nu pie tuoketuo la.”

³⁴ Jihovae Mosa ki diekhakeshü mhiei Aron-e khrukhre di süu khapie baketuo la, süu khapie dietseidiekho-u mhodzünu shüshü.

³⁵ Mu Israelkoe cie hiedia manna cü, ukoe themia lhoulie kevi kijü nu vor tsolie kemochie, Kanan kijü rie nu vorlie kemochie, ukoe mannau cü.

³⁶ Omer puoe efa za ker chü di za puo.