Toukepra 15 - Angami Naga CL (Re-edited) Bible (BSI)

Mosa Tsaliu

¹ Süsie Mosa mu Israelmiako Jihova ki tsali hau chü di sie: “A Jihova ki kelishütuo, puoe kuo kemeyie philieketa la; kier-u mu puo gei kebau puo thuo kelhoupie dzükezha nu shüwa.

² Jihovae a kekuo mu a tsali, mu puo a kelakelieu chüliete; hauha a Kepenuopfü, a puo tshe zotuo, a puou Kepenuopfü, a puo pu kerükrietuo.

³ Jihova sü terhümiaviu Jihovae puo zauwe.

⁴ “Faro kierbageiko mu puo krodiko puoe kelhoupie dzükezha nu shüwate; mu puo krüta kevithoko bu Kemerie Dzükezha nu rülete.

⁵ Dzüdi thuo uko vulie; ukoe ketsie tuoi kesou nu rüle tsute.

⁶ He-i Jihova, n dzie n zatsa, kekuo nu zayie kechüu, he-i Jihova, n dzie n zatsa, ngumvümia biewaya.

⁷ N kekuo kezha nunu no n ngumvümia penyüwaya, no n noupfhü ketseshü ro, süue rügu tuoi uko the pejüwaya.

⁸ N nyhüki nyhüpfhüshü ru dzüko ketoupfü sieta, dzüdiko pfhepfü thata; kesouko dzükezha metsuo nu meteitota.

⁹ Ngumvüue sie, ‘A puo whuotuo, a puo tsolietuo, mhavakelieko kezatuo, uko geinu a kemenguu chü tseituo. A a zhiecha zupielietuo, a dzie thuo uko pekawatuo.’

¹⁰ Noe n teikhrie kerükhrieshü, dzükezha thuo uko vulie; Guli tuoi ukoe dzükezha nu rületa.

¹¹ “He-i Jihova, terhuoko donu suonie n mhie ga? supuo n mhie, kemesa nu kuo phi di, mhatho kevithoko nu u ngokecü chüya ga?

¹² No n dzie n zatsa yhashü ru kijüu uko mezulie.

¹³ “Noe rhakelie themiako la n kekhrie ketho se uko chathaliete, n kekuou se uko cha tha ze n kemesa ba nu voliete.

¹⁴ Themiakoe si, ukoe peta; kelhokemezie thuo Filistia nu kelhouko teliete.

¹⁵ Edom nu peyuko u ziekejü chü bata; Moab krütako perüsürüsa bata; Kanan nu lhou keba pete ze jüte.

¹⁶ Kemichie mu kemeriekecü uko gei tsur bate; n bou kekuo kezha la, uko ketsie tuoi tsesei bate. N themiako philie kemochie, he-i Jihova, noe khrükelie n themiako philie kemochie.

¹⁷ N thuo uko se vo di n kijüthou gei leishü, he-i Jihova, n kebachü chütuo üdi chükelie thechüu gei, he-i Jihova, n dzie pie chükelie kemesachüu gei.

¹⁸ Jihovae kechachie mu kechachie dituo.”

¹⁹ Faro kierko mu kierbageiko, puo kierkeseko dzükezha nu tuo leta tse, Jihovae dzükezha nu dzüko se la vor uko gei shüshü; derei Israelmiako bu we kijü so di dzükezha metsuo nu tuo philie.

Miriam Tsali

²⁰ Sitse Miriam, siedzekesipfü, Aron üpfü, tambourin puo pielie, mu thenumia pete übou pie nashü di puo siemedzi vota.

²¹ Sitse Miriam uko ki kelishü: “Jihova ki kelishülie, puoe kuo pezha philiete eru; puoe kier mu puo gei kebau kelhoupie dzükezha nu shüwate.”

Dzü Kepfhü Chü Pemoukewa

²² Sitse Mosae Kemerie Dzükezha nunu Israelko bu tuoshülienu pushü, mu uko Shur rayha nu vorlie; ukoe rayha nu zha se tuo di dzü ngulie mota.

²³ Ukoe Mara nu vorlie ru Mara nu dzüu kepfhü la krielie kenjüta; süla puo zapie Mara chü.

²⁴ Sitse themiakoe Mosa gei panya di sie, “Úko kedipuo krie ta?”

²⁵ Sitse puoe Jihova ki melieshü; ru Jihova sei puo thashü puo kie, ru puoe süu kelhoupie dzü nu shü, sitse dzüu mouta. Sünu Jihova thezho puo mu diekhakeshü puo chüshü, sidi puoe uko dojü di sie,

²⁶ “Niekoe pecü di Jihova nie Kepenuopfü pfhe rünyü, puo mhinguki mezhükecüko chü, puo diekhakeshüko rünyü mu puoe chünukecüko zeya ro, a Ijiptko gei kechü khakeshüko puorei pie nieko gei shülie lho; Ae Jihova, nie chü keshürhokeshüu zo.”

²⁷ Süsie ukoe Elim nu vorlie, sünu dzüluo kerekenie ba tsiu kukuobopfü hiethenie ba, mu ukoe sünu dzü khieki nu uko razhüchü chülie.