Toukepra 14 - Angami Naga CL (Re-edited) Bible (BSI)

Kemerie Dzükezhau Ciekelie

¹ Süsie Jihovae Mosa ki:

² “Israelmiako bu rürei tsiesie la di Pi-hahirot mhodzünu, Migdol mu dzükezha unie donu Baal-zefon rütsie nu balienu shülie, nieko süu rütsietsa dzükezha khie balie.

³ Faroe Israelmiako pu di, ‘Ukoe kijüu bu uko mapfüliete; rayha thuo uko khapieliete,’ situo.

⁴ Mu a Faro nou chü pereshütuo, sidi puoe uko whuo votuo mu a Faro tsiu puo krodi pete mho zayie chütuo; mu Ijiptmiako bu a Jihova zo ücü silietuo.” Mu ukoe sükemhie chülie.

⁵ Themiako tataücü kediu ki pushü tse, Faro mu puo kituoko nou rüdita, sidi ukoe sie, “Israelko bu uko lie kechü nunu tuotakecü, uko kedipuo chüwata mu?”

⁶ Süla puoe puo kierbagei keselie mu puo rüpfhünuoko zelie;

⁷ mu kierbagei kevitho kedakecü krie sorou mu Ijipt nu kierbagei kekrei pete, süko mhokezhako ze di.

⁸ Mu Jihovae Ijipt nu kediu Faro nou chü perewa di puo Israelmiako mha rünyü mo di tuokezhüko whuo vo.

⁹ Ijiptmiakoe uko whuo vo Faro kierko tsiu kierbageiko pete, puo kierkeseko mu puo rüpfhünuoko, di uko dzükezha khie Pi-hahirot khie, Baal-zefon mhodzütsa vakecü kinu uko tsolie.

¹⁰ Faroe uko penuo vorliecü ki, Israel nuonuokoe meho sie ru, harie, Ijiptmiakoe uko sie vorkezhü ngushü. Sitse Israelkoe michie phi di shiepie Jihova ki shüta.

¹¹ Ukoe Mosa ki, “Ijipt nu mekhru chü jüta üdi no rayha nu hie pesiatuoü hie ze par me? Ijipt nu hie ze parkeshü ha no mha kikecüpuo chüpie hie gei shüwata ga?

¹² Hieko Ijipt nu rei, ‘Hie khapie hie bu Ijiptmia lie chü batacie,’ idi n ki pu mo me? Ijiptmia lie chü baketau we rayha nunu siakezhüu ki hie la vikuo.”

¹³ Sitse Mosae themiako ki, “Michie hie, tha meteilie, sidi Jihova kelakelie, puoe thie nie la chüshüketuou mehoshücie, kekreilamonyü nieko thie Ijiptmia ngu kethako, nieko mhakipuorei uko ngu salie lhote.

¹⁴ Jihova nie la kegeituo, mu nie-e kemekrie balie ro si zo.”

¹⁵ Jihovae Mosa ki, “Kiüdi a ki shiezhü ga? Israelko bu tuo zozhülie nu pushülie.

¹⁶ N theu pie sieshülie, mu n dzie yhapie dzükezha mho shü di süu kho kezawalie, Israel nuonuoko bu dzükezha pfüthe di kijü keso nu philieketuo la.

¹⁷ Siro a Ijiptmiako nou bie perewatuo, sitse ukoe uko siewhuo zo votuo mu a Faro, puo krodiko, puo kierbageiko mu puo kierkeseko mho zayie ngulietuo.

¹⁸ Sidi Ijiptko bu ae Jihova zo ücü silietuo, ae Faro, puo kierbageiko, mu puo kierkeseko mho zayie ngulieta ro.”

¹⁹ Sitse Ukepenuopfü dielieu Israel krodiko mhodzünu ketuou, tuose uko sietsa vota; mu kimhou co-u uko mhodzütsa nu rüdi se uko sietsa vota.

²⁰ Sidi vo Ijipt krodiko mu Israel krodiko donu thata. Sitse kimhou mu kezeiu bata, tsiu süu theva kezie pie hako tsü; sidi miapuorei kekreiu penuo mo di teizeizha pete vota.

²¹ Süsie Mosae puo dzie yhapie dzükezha mhogei shü; ru Jihovae niathutsa teikhrie re sekecü puo bu teizeizha pete dzükezhau whuo pesieshü, sidi dzükezhau pie kijü keso chüshü, sitse dzüko kezapfü bata.

²² Sidi Israelmiako bu kijü so di dzükezha metsuo nu philie, dzüko thuo uko zatsa mu uko vitsa sozha puo chülieta.

²³ Ijiptmiako uko whuo zo dzükezha metsuo nu leta, Faro kierko, puo kierbageiko mu kierkeseko pete.

²⁴ Mu teiso varüpar ru mico-u mu kimhou co-u nu ketuo Jihovae Ijiptmia krodiko meho tsu di uko bie kemide phiwa,

²⁵ Uko kierbagei thuoko bie pethowa di uko bu re phi di süko shüsiepfü; sitse Ijiptmiako sie, “Úko Israel mhodzüki nu tata khe, Jihova uko yapie di Ijiptko ze kegeizhüta zo.”

²⁶ Sitse Jihovae Mosa ki, “N dzie yhapie dzükezha mho shüshücie, dzü bu Ijiptmiako, uko kierbageiko, mu uko kierkeseko mhogei vorlieketuo la.”

²⁷ Süla Mosae puo dzie yhapie dzükezha mhogei shü ru teiso par tse dzükezhau puo thuo puo dzüthou chü la vo hadzü de sou lata; mu Ijiptmiako süu mhodzünu tasie, sirei Jihova Ijiptmiako kelhoupie dzükezha nu shüwa.

²⁸ Dzükoe la vor di kierbageiko, kierkeseko mu Faro krodiko pete uko medzi dzükezha nu kele pete vupfülie. Uko miapuorei lhieshü mo.

²⁹ Derei Israelmiako we kijü so di dzükezhau pfüthe philie, dzüko thuo uko zatsa mu uko vitsa sozha puo chülieta.

³⁰ Hamhie di Jihovae sünhie Ijiptmiako dzie nunu Israel kelalie; mu Israel-e Ijiptmiako dzükezha khie siakezhü ngushü.

³¹ Israel-e Jihova Ijiptmiako petsou di mhatho kezha chükeshü ngushü, tsiu themiakoe Jihova preilie, siro Jihova mu puo kituou Mosa pelelie.