Toukepra 13 - Angami Naga CL (Re-edited) Bible (BSI)

¹ Jihovae Mosa ki:

² Nuorie khe chü kemesapie a ki shücie; Israelmiako donu, themia mu khunuo shierei; penuolie kerieu sü a vie.

Khreiüshükemo Niekhrüdanyiu

³ Sitse Mosae themiako ki, “Teisozha hau rükralie, Ijipt nu, kedie chü keba kiu nunu tuo parkelie zhau, Jihova dzie kekuou thuo thechü hau nunu nieko ze parkelie la; khreiükeshü niekhrüda puorei cülie lho.

⁴ Thie Abib-u khrü, nieko tuo pralietuo.

⁵ Siro Jihovae nieko ze Kananmiako, Hitmiako, Amormiako, Hivmiako mu Jebusmiako kijü nu, puoe nieko tsütuo üdi nie puonuoko ki rüsekeshü, mithunudzü mu mepfhidzü krukezhü kijüu nu nieko ze vokeshü sie, niekoe thekhrü hau nu mhatho hau chütuo.

⁶ Zha thenie niekoe khreiüshükemo niekhrüda cütuo, mu zha thenie nhie Jihova ki keshü thenyi puo batuo.

⁷ Khreiüshükemo niekhrüda zha thenie cütuo; khreiükeshü niekhrüda bu nie kengu nu mu nie kijü nu kehourapuorei ba lho.

⁸ Mu no sünhie sie n nuou ki, ‘A Ijipt nunu ta kepar ki Jihova a gei kedipuo chüshü shikecü la zo’ ikecü putuo.

⁹ Jihova zho-u bu n tie nu balieketuo la, süu bu n dzie nu zasi puo tuoi mu n mhinie donu mha kerükra puo chütuo: Jihova thedzie kekuo se di Ijipt nunu n ze parkeshü la.

¹⁰ Süla noe pethoshüketa hau teiciekepra puotei ki chütuo.

Nuorieko Chü Kemesakecü

¹¹ “Jihovae n ki mu n puonuo ki rüsekeshü tuoi, n ze Kananko kijü nu vorshü di, süu pie n tsüshü ro,

¹² noe penuo par kerie pete kha kreipie Jihova tsütuo. Nie kiri penuo kerie thepfu pete Jihova vie zotuo.

¹³ Gada nuorie kehoupuorei noe tekuonuo puo pie puo rhatuo. Morei mhanuü no süu rhalie mota ro, siro süu vo bietshewa morosuo. N nuonuo thepfuko donu penuolie kerie kehoupuorei, noe rhatuo.

¹⁴ Thiesie n nuo n ketso di, ‘Hau puoca kedipuota mu?’ iro, noe puo ki, ‘Jihova thedzie kekuo puo pie Ijipt nunu, miadie kechü kiu nunu úko ze parshü.

¹⁵ Faroe puo nou re di hie bu tuo mvüketa ki, Jihovae Ijipt kijü pete nu nuorieu pete dukhriwa, themia nuorieu mu kiri nuorieu rei. Süla ae thepfu penuo par kerieu pie Jihova ki ruosuo chüya; derei a nuonuo kerieu we a rhalieya.’

¹⁶ Hau bu n dzie gei morei n mhinie donu zasi puo chütuo; kekreilamonyü Jihova thedzie kekuo puo pie Ijipt nunu u ze parkelie la.”

Kimhou Co-u mu Mi Co-u

¹⁷ Faroe themiako bu tuokelie ki, Ukepenuopfüe uko ze Filistinko kijütsa vo mo, cha süu dzükuo zorei, Ukepenuopfüe sie, “Themiako terhü ngu tse u nou rüdita di Ijipt nu la vota rei silie lhomu.”

¹⁸ Derei Ukepenuopfüe themiako cha tha ze rayha cha ze whi di Kemerie Dzükezhatsa vota. Mu Israelmiako Ijipt kijü nu tuo pracü ki terhü chüketuo la uko kesepfü pra zo.

¹⁹ Siro Mosae Josef ruko ketapie tuo; kekreilamonyü Josef-e thethochü Israelko ki rüse di, “Ukepenuopfü nieko meho zotuo; siro niekoe hanunu a ruko chüse nieko medzi morosuo.”

²⁰ Mu ukoe Sukot nunu tuoshü, di rayhau khie Etham nu vo thuselie.

²¹ Siro Jihovae uko cha thaketuo la khinhie gei kimhou co puo mu theva gei uko va pezieketuo la mi co puo chü di uko mhodzü tuotuo zo. Uko bu khinhie rei theva rei tuolieketuo la.

²² Khinhie gei kimhou co-u mu theva gei mi co-u themiako mhodzü nunu tuota mo.