Toukepra 12 - Angami Naga CL (Re-edited) Bible (BSI)

Ciekevo la Mha Kesekecü

¹ Jihovae Ijipt kijü nunu Mosa mu Aron unie ki:

² Nie la thekhrü hau bu thekhrüko donu kerieu chütuo; nieko la süu bu teicie nu thekhrü kerieu chütuo.

³ Israel pete bu hau khrü zha ker nhie kikru puo tse nu tekuonuo puopuokecü selienu di Israel mechükehouu ki pushücie.

⁴ Mu mhanuü kikru kecü puoe tekuonuo puo u la zhathorta ro, mia puo kidepuo cülietie shikecü themia tsüphrü le di, puo ki khieki keba puo zanuou ze tekuonuou kerhelie.

⁵ N tekuonuou bu kemesa puolie, cie puo keta puochü yopuo morosuo; tekuo donu morei temvü donu süyo pielie.

⁶ No süyo hau zha keredia ketso khapie tha morosuo, sidi Israel pete vor kengukelie mechükehou nhie theva ze uko kuonuoko dukhrituo.

⁷ Süsie ukoe puo zie huo selie di, pie mhacüketuo kiu kikha conie mu kikha mho kiprü gei kenheshütuo.

⁸ Uko süzhü tekuonuou chü cütuo; uko süu rielie di khreiüshükemo niekhrüda mu ga kepfhü sa di cütuo.

⁹ Puorei kerhei morei dzü pie cha di cü lho, derei puo tsü, puo phiko mu puo nounya pete mi nunu rie di cütuo.

¹⁰ Siro yopuorei peshapie ba khise tso hie, mu khise ketso baketa petekoe thewatuo.

¹¹ Hakemhie di niekoe süu cütuo: nie chieca phapfü, nie phi gei phikou nyü, mu nie dzie nu kethe se, sidi nie rükri se di cütuo. Süue Jihova ciekevo-u zo.

¹² Kekreilamonyü ae süzhü Ijipt kijü pfüthe votuo, mu ae Ijipt kijü nu nuorie khe biewatuo, themia mu khunuo rei, siro Ijipt rhuoko pete gei ae capi chüshütuo: Ae Jihova zo.

¹³ Thezieue nie la zasi puo chütuo, nie keba kiko gei; ae thezie ngu ro, ae nie cie pratatuo, mu ae Ijipt kijüu vükeshü ki, thepetheruou nie gei tsur di nie pekawalie lho.

¹⁴ Zha hau nie la kerükra teisozha puotuo; mu nie Jihova ki keshü nyi üdi se tuotuo; nie thephou pete nu süu pie thenyi zha puo chüwa di medzituo.

Khreiüshükemo Niekhrüdanyi

¹⁵ Zha thenie nhie khreiüshükemo niekhrüda cütuo; zha therie nhie nie-e nie kiko nunu khrei chü kelhiwatuo, mhanuü mia kehoupuorei zha therie nhie mu zha thenie nhie ketso khrei keshü vie cü ro, themia süu Israel nunu dathewatuo.

¹⁶ Zha therie nhie nie-e kemesa kehou puo chütuo, mu zha thenie nhie rei kemesa kehou puo pie batuo; teisozha süko nu mhapuorei chülie lho derei mia pete bu cü morokesuokoyo rübei kesetuo.

¹⁷ Mu niekoe khreiüshükemo niekhrüdanyiu nyituo, kekreilamonyü ae teisozha hanhie Ijipt kijü nunu nieko krodi ze parlie: süla niekoe phou pete nu teisozha hanhie thenyi hau bu batuoü tholieketa hau kenyünyü seituo.

¹⁸ Thekhrü therieu nu, zha keredia nhie thevatie, niekoe khreiüshükemo niekhrüda cütuo, si zo vo khrü zha mepfüepuo nhie thevatie tsotuo.

¹⁹ Zha thenie we nie kiko nu khrei puorei bu balie lho; kehoupuorei khreiükeshü vie cü ro, Israel mechükehou nunu süu dathewatuo, puo thuo solhimia rei, morei khenu kelhoumia zorei.

²⁰ Nie khreiükeshü vie puorei cülie lho; nie lhou kebachü pete nu khreiüshükemo niekhrüda cütuo.

²¹ Süsie Mosae Israelmia phichüko pete kielie, di uko ki, “Nie thuo nie kikru la tekuonuo kedaliecie, sidi ciekevo kuonuou dukhrilie.

²² Siro hisop nha phro puo selie di pie seikhou nu keba thezieu selie, sidi pie kikha mho kiprüu mu kikha conie vüshülie; nieko miapuorei bu teisolie kemochie puo kikhau cie pralie lho.

²³ Kekreilamonyü Jihovae Ijiptmiako biewaketuo la tuo pfüthe votuo; süki puoe kikha mho gei kiprüu mu kikha conie gei thezie ngu ro, Jihovae kikha mho cie votatuo, mu kepekau bu nie biewatuoü nie kinu lelie lho.

²⁴ Nie mha hau nie la mu nie nuonuo la rei thashüwaketa puo üdi kechachie kenyü tuotuo.

²⁵ Siro niekoe Jihova phrakeshü tuoi, puoe pie nie tsütuo ükeshü kijüu nu vorlie ro, nie mhatho hau chüshütuo.

²⁶ Mu nie nuonuoe nieko ki, ‘Mhatho hau ca kedipuo ga?’ idi ketso ro,

²⁷ nie-e uko ki, ‘Hauha Jihova ciekevo ruotho-u we, puoe Ijipt nu Israelmia kiko cie vota, Ijiptmiako dukhricü ki derei úko kiko we lhieshücü la,’ isituo.” Sitse themiako utsü tsünge tsu di rüsuota.

²⁸ Sitse Israelko vo di sükemhie chülie; Jihovae Mosa mu Aron unie ki diekhakeshü mhiei, ukoe chülie.

Thepe Thelau: Nuorieu bu Siakecü

²⁹ Theva khisoteiluo Jihovae Ijipt kijü nu nuorieko pete biewa, Faro kediba gei keba nuorieu nunu vo kediebou nu kebau nuorieu ketso, khurinuo nuorieko pete sa.

³⁰ Faroe theva gei sielie, puo mu puo kituoko pete, siro Ijiptmiako pete rei, sidi Ijipt kijü nu kra bouübita, ki puo nu rei siakemo jükecü la.

³¹ Siro Faroe teizei geinu Mosa mu Aron unie kie, di unie ki, “Sielie, di a themiako donunu tuotalie, no mu Israelmiako rei; volie, di nie kepu tuoi, Jihova rüsuoliecie!

³² Nie kuoko mu nie thukroko ze pratalie, nie kepu tuoi, sidi tuotalie; mu japie a rei tsücie.”

Tuokepra: Ramese nunu Sukot nu Kevo

³³ Siro Ijiptmiakoe themiako gei u nouselie, rünau nunu uko ketse prawatuoü di; ukoe sie, “U pete siatatiemu, iketa la.”

³⁴ Süla themiakoe uko thou nepie kebako khreiüshükemo nu chü pielie, uko thou kene khouko pie uko pfhe nunu kezipie uko bouka gei shülie.

³⁵ Israelmiakoe Mosa uko ki pukeshü tuoi chülie, ukoe Ijiptmia kinu rakachü tsiu suna rütsonyieko mu pfhemeneiko chalie;

³⁶ mu Jihovae themiako bu Ijiptmiako mhinguki uko khriepfülie, süla ukoe chakeshü pete pie uko tsüshü. Sükemhie di ukoe Ijiptmiako vie pekalie.

³⁷ Israelkoe Ramese nunu Sukot ketso tuo volie, uko mia nyie krie sorou mese u phi pie tuo, nhicumia sa kemo.

³⁸ Siro themia kekreikecü krodi puo rei uko ze vo, mu kiri kekra sa, tekuokro tsiu mithukro rei.

³⁹ Mu ukoe Ijipt nunu se kepar khreiüshükemo thou ne se ketuoko rielie, süu khrei pie shü kemo la, kekreilamonyü Ijipt nunu pfhe balie lho di uko ne phrawaketa la, mu uko bu u la kecüca puorei keselie mokecü la.

⁴⁰ Israelko Ijipt nu lhoukecü cie kriedia di ser.

⁴¹ Siro cie krie dia di ser tsei touketa nhie, Jihova krodi pete Ijipt nunu tuo prata.

⁴² Uko ze Ijipt nunu parkelie la, teizeizha süu pie Jihovae pfhe pecü bakeshü teizei puo chü; süla Israelmia thephou pete nu hazhü pie pfhe pecükecüu teizeizha puo chü di zeya.

Ciekevonyi la Chüketuo Zho Pu Sakeshü

⁴³ Siro Jihovae Mosa mu Aron unie ki, “Hauha ciekevonyi la thezhoko: seyie kekreimia bu süu cülie lho;

⁴⁴ derei raka pie khrülieketa kedieu we puo zhürewaketa sie süu cülie vi.

⁴⁵ Kediemia morei zhakhrü ze ketuomia puorei süu cülie lho.

⁴⁶ Ki puo nu süu cütuo; nie themuo süu puo rei pie kiu cielie lho; mu nie puoru puorei bietshelie lho.

⁴⁷ Israel mechükehou pete süu ze morosuo.

⁴⁸ Mu solhimia puoe vor n ze ba di Jihova ciekevonyi nyi nyü ro, puo kiünuomia thepfumia pete bu u zhü rewalie, süsie puoe penuo vor di süu ngulie vi; puoe khenu kelhoumia puo tuoitatuo. Derei u zhürekemomia puo bu rei süu cülie lho.

⁴⁹ Khenu kelhoumia mu solhimia nie donu kelhoumia la thezho puo zotuo.”

⁵⁰ Israelko pete sükemhie chülie, Jihovae Mosa mu Aron unie ki diekhakeshü tuoi, ukoe chülie.

⁵¹ Mu sünhie Jihovae Israelko Ijipt kijü nu krodi krodi chü di ze parlie.