Toukepra 10 - Angami Naga CL (Re-edited) Bible (BSI)

Kuprie Chüpie Mha Pekakewa

¹ Sitse Jihovae Mosa ki, “Faro ki volie; ae a zasi hako pie uko pekieshütuo üdi, puo mu puo kituoko nou chü perewatakecü la.

² Sidi nie bu nie nuonuo tsiu nie tsunuoko kesikengu ki nu ae Ijiptmiako pie kethekrekeshü mu uko donu zasi kikecü kro puo chüshü shikecü pu tuotuo; nie bu ae Jihova zo ücü silieketuo la.”

³ Süla Mosa mu Aron unie Faro ki vo, di puo ki, “Jihova, Ibriko Kepenuopfüe puya, ‘Kichiepuo no a mhodzüki n thuo n bie kerünuoshü mvü ba zotuo ga? A themiako bu tuoliecie, uko bu a rüsuoketuo la.

⁴ Mhanuü noe a themiako bu tuo mvüta ro, harie, sodu, a kuprie se vor n kijü nu shütuo.

⁵ Mu ukoe kijüu zie zepfülietuo, sidi miapuorei bu kijü bacü ngu motatuo. Tsiu ukoe prü bu va kepeshako cülietatuo, mu ukoe nie lie nu keba seiboko pete cülietuo.

⁶ Siro ukoe n kiko nu, n kituoko pete kiko nu, mu Ijiptmia pete kiko ketshu chülietuo, nie puotsanuoko, morei nie puonuoko kijü nu lhou vor tse nunu vor thie ketso ngu kemo chüshütuo.’ ” Süsie puo rüreilie di Faro ki nunu tuo prata.

⁷ Sitse Faro kituokoe puo ki, “Kichiepuo themia hau bu u la kebie puo mhiei ba zotuo mu? Uko bu tuotacie, Jihova uko Kepenuopfü rüsuolieketuo la; no tsie rei Ijipt pekawaketa si moluo me?”

⁸ Süla Mosa mu Aron unie ze la Faro ki vor; ru puoe unie ki, “Volie, di Jihova nie Kepenuopfü rüsuolie; derei nieko suomia bu votuo ga?”

⁹ Sitse Mosae sie, “Hieko phichünhicu ze votuo; hie hie nuonuo thepfu mu thenuko tsiu hie kuokro siro hie thukro rei ze votuo, thenyi puo nyipie Jihova ki shü morokesuo la.”

¹⁰ Sitse puoe unie ki, “Mhanuü ae nie nuoko bu nie ze votuoücü siewe, Jihova nie ze tuotie. Nie nou mha kesuo rhü bata tou zeru.

¹¹ Mo, lho zo, nie donu thepfumiako vo di Jihova rüsuolie, nieko kemengu süu ze di,” sidi Faro mhodzü nunu unie whuowa.

¹² Sitse Jihovae Mosa ki, “Kuprieko la n dzie yhapie Ijipt kijü mho shücie, uko bu Ijipt kijü pete nu vo di prü bu va kepesha nha pete cülieketuo la”

¹³ Süla Mosae puo theu yhapie Ijipt kijü mho shü, mu Jihovae kijüu mho niathu teikhrie se vor di sünhie zhate mu teizeizha pete rükhrie bata, sidi teiso vor tse niathu teikhrieue kuprie hepfü vorshü.

¹⁴ Tsiu u kupriekoe Ijipt kijü pete mho vor di Ijipt rüna pete nu bata, kuprieko krakrapie thiedzü mu thiesie rei süde ngulie kelho parta.

¹⁵ Sükoe kijü pete zepfülie, sidi kijüu zeibouita, mu sükoe kijü nu nhako pete tsiu seiboko gei nhasi pete prü va peshakeshüko cülie, Ijipt kijü pete nu nha kepejo yopuorei tuo mota, seibo morei lie nu nhabo rei.

¹⁶ Sitse Faroe rükri Mosa mu Aron unie kieshü, di unie ki, “Ae Jihova nnie Kepenuopfü mu nnie mhodzü phoumawate.

¹⁷ A kephouma tsieu va la vashücie, sidi Jihova nnie Kepenuopfü bu a kinu kesia vie hau setaketuo la chashücie.”

¹⁸ Süla puo Faro mhodzü nunu prata; di Jihova ki chashü.

¹⁹ Sitse Jihovae niakra teikhrie re sekecü puo chü kerükhrieshü di süu bu kuprieko he se vo Kemerie Dzükezha nu shüwa, sidi Ijipt kijü pete nu kuprie yopuorei tuo mota.

²⁰ Derei Jihova Faro nou chü perewa, mu puoe Israel nuonuoko bu tuo mota.

Ijipt Kijü Pete Zeibouiketa

²¹ Süsie Jihovae Mosa ki, “N dzie yhapie teitsa vashücie, Ijipt kijü mho zeibouikecü bu bataketuo la, zeipie bielie kevi chü zokecü puo.”

²² Süla Mosae puo dzie yhapie teitsa vashü, ru Ijipt kijü pete mho zha se zeibouita.

²³ Uko huoniehuo ngulie kenjüta, mu zha se we miapuorei puo ba nunu sie rei mota; derei Israelko ba nu we zie ba zo.

²⁴ Sitse Faroe Mosa kieshü di, “Volie, di Jihova rüsuolie, nie nuonuo rei nie ze volie vi; nie kuokroko mu nie thukroko rübei khapie bawalie.”

²⁵ Derei Mosae sie, “No hie bu Jihova hie Kepenuopfü rüsuolieketuo la ruosuo mu kethe ruosuo khashülie kevi chü morosuo.

²⁶ Hie kiri bu rei hie ze vo morosuo, puomou puorei khawalie lho, Jihova hie Kepenuopfü rüsuoketuo la süko ze vo morosuo, mu hie sünu vo tsolie kemo ki kedipuo se Jihova rüsuotuo shikecü si kemo la.”

²⁷ Derei Jihovae Faro nou chü perewa, di uko bu tuo mvüta.

²⁸ Sitse Faroe puo ki, “A kinu tuotalie, n thuo menuolie; a zie ngu la sa hie; no a zie ngu lakecü nhie no siatuokecü la.”

²⁹ Mosae sie, “N kepu tuoi, a n zie ngu lalie lho.”