Toukepra 1 - Angami Naga CL (Re-edited) Bible (BSI)

Israelmiako Ijipt nu Kemezhiekecü

¹ Hako Israel nuo thepfuko Jakob ze Ijipt nu ketsurko za, u kikru u thetse sa:

² Reuben, Simeon, Levi mu Juda,

³ Isakar, Zebulun mu Benjamin,

⁴ Dan mu Naftali, Gad mu Asher.

⁵ Jakob nuosenuoyie pete kesa mia hiethenie. Josef we uko mhodzü Ijipt nu tuota.

⁶ Süsie Josef siata, puo siezedzürieko rei mu phou süu pete rei.

⁷ Derei Israel nuosenuoyie we kruo philie mu zha philie; uko kra philie di kuo phita; sidi uko lhou kijü süu tshuta.

⁸ Sükisü Ijipt mho kedi kesa Josef si kemo puo sier.

⁹ Mu puoe puo themiako ki pu di sie, “Harie, Israelko ha u ki krathor mu kuothorte.

¹⁰ Vorlie, úko uko gei u do vilie khe, uko kra philieta rei si momu, sidi terhü puo vor ro, uko u ngumvümia zeta di u perhie phir di u rüna nunu tata rei si momu.”

¹¹ Sidi thepie kemesi khapie uko gei shü di uko bu kemezhieketuo la uko mhatho niepuko khapie bawa, sidi uko Faro la mha khapie baketuo nadinie Pithom mu Ramese chü.

¹² Derei uko pese kra mu uko kruo miemieta mu uko kezapie meya miemie prata. Süla Ijiptmiakoe Israelmiako la merie bata.

¹³ Ijiptmiae Israelko bu mhatho kere chü,

¹⁴ mu uko bu nyorietsie chü tsiu lie nu mhatho neiüko chü di lhou kemezhie phita, tsiu mhatho pete nu uko bu mhatho keretho chü.

¹⁵ Siro Ijipt nu kediue Ibrimia nuoze kethekepfünie, miapfü puo za Shifra mu kekreipfü za Pua, ki pu di sie,

¹⁶ “Nnie Ibripfüko nuoze thekecü ki, nuokezechü nunu uko mehoshü di, thepfunuomiata ro puo dukhriwalie, derei thenunuomiata ro, perheishülie.”

¹⁷ Derei nuoze kethekepfünie Ukepenuopfü khrüprei, süla Ijipt nu kediu unie ki diekhakeshü mhiei chü mo, sidi thepfunuoko rei perheishüshüta.

¹⁸ Süla Ijipt nu kediu nuoze kethekepfünie kielie di unie ki, “Nnie thepfunuoko bu rei rheilie keba hau kedipuo chü bata ga?”

¹⁹ Sitse nuoze kethekenie-e Faro ki, “Kekreilamonyü Ibrimiapfü sü Ijiptmiapfü mhie mo, ukoe mecamekhrocü la nuoze kethekemia kevor mhodzü unuo zelietaya.”

²⁰ Süla Ukepenuopfüe nuoze kethekenie gei vishü, sidi themiako kruolie mu kuo philie.

²¹ Siro nuoze kethekenie Ukepenuopfü preicü la, puoe unie bu unie kikru nyilie.

²² Süsie Faro puo themia peteko ki diekhashü, “Ibrimia thepfunuomia penuokelie pete kelhoupie Nail rüu nu shüwalie, derei thenunuomia we pete perheishülie.”