Tita 3 - Angami Naga CL (Re-edited) Bible (BSI)

Mhatho Kevi Chükecü

¹ Siro uko bu mia kekhayakezhako mu kekuokeseko khrükhro balienu, mu dieze chülienu, mhatho kevi kehoupuorei chülienu pushülie,

² tsiu u bu mia dze kesuo puorei pu hie, keprüli hie, huoniehuo gei u zho mene, mu mia pete gei vilie.

³ We rei thiedzü mhale mo, mia die ze mo, cha vajopfü, u menguko mu u nei u nyü kekra die chü vor, sidi mha kemehou mu mha kesuo nu u tei pevo, mia rütse, tsiu huoniehuo ngumvü vor.

⁴ Derei u Kelakelieu Ukepenuopfü kevi mu mia ngukemezhie par tse,

⁵ puo thuo u kelalie, u thuo u kemiatho nunu chükelie mhathoko la monyü, puo thuo u ngumezhiekeshü la zo, süusü penuo kesakelie dzü nu tsiu Kemesa Ruopfüu geinu chü kesakelie zo.

⁶ Puoe u Kelakelieu Jisu Khrista geinu Ruopfüu rupie u ketshu chüwate,

⁷ mu süusü ngukemezhie bu u chü kemezhüpie kechachie kerhei siedzeu nu kayiemia chülieketuo la zo.

⁸ Die hau ketho zo. A n bu mha hako putsa bakelie mengu, sitse Ukepenuopfü pele vorkelieko u khapie u terüchü di mhatho keviko chülietuo; mha hako vithor zo mu kehoupuo la rei kemevi ba.

⁹ Derei kemethuo puo se kemeü, u puotsanuo phrü kekie di keprüli kemethuo chü hie, huoniehuo perhiekecü tsiu thezho-u la keprülikecü hako therhie zolie, sükoe puo kepra puorei jü mu kemethuokemeruo zo.

¹⁰ Va puo moro va kenie tarhokeshü sie mia pfükhoyakezhamia la n nounyü sa hie,

¹¹ themia sikecümia ketho-u therhiete mu phouma zo vo di u thuo u pejowaya.

Thekhadie

¹² A Artemas moro Tukika ketsepie n ki keshü ki no Nikopoli nu vor a ze kese beicie, a teisei ki sünu batuo üyacü la.

¹³ Siro thezhokesiu Zena mu Apolo unie ketseshülie, siro unie bu mhapuorei tsopfhü molieketuo keseshülie.

¹⁴ Siro themiako bu mia tsopfhü teiko nu mia vaphilieketuo la mhatho keviko chü mezhieliecie, sitse uko mhachülie moketa chü lho.

¹⁵ A zekebako pete n kelushü ho. Kepeleu geinu hie khriekezha pete kelushücie. Ngukemezhie bu nie pete ze bakelieu chüliecie.