Tita 2 - Angami Naga CL (Re-edited) Bible (BSI)

Kepethadie Puotoukecü

¹ Derei no zowe kepethadie puotoukecüko medzi toucüko pu petha ba zolie.

² Phichümia bu u kethekere, mesümede, meciephrüi balie, mu kepele nu, kekhrie nu, mu shügeshühiekecütsa vi balie.

³ Sütuoi ketsapfüko bu rei u zho u rüli nu menuo, mia tha mo morei zu die chüta mo; siro mha kevi pie mia pethakecümia chülie,

⁴ sitse ukoe thenupfü kemedzüko pethapie u nupfunuoko khrie, mu u nuonuo khrie,

⁵ mu u thuo u kethekere, mesa, kitiekinu se menuo, mia khrie tsiu u thuo u nupfunuo khrükhro balietuo, sitse Ukepenuopfü dieu thawa molietuo.

⁶ Sükemhiei thepfumia zharatakemomia bu rei u kethekerelienu hü beicie.

⁷ No mhatho kevi kheko nu thakie puo chü mia kielie, siro kepetha nu rei kedietho mu kemesü se pekieshülie,

⁸ mu n diepu puo nu rei mia bu n telie kelho chü zolie; sitse n kepetsoumia bu n gei mha kesuo puorei pulie kenjü di mengalietuo.

⁹ Miadiemiako bu rei u niepumiako khrükhro balie mu mhakehoupuo nu rei u neiu chüshülie; süko bu mia prüli hie,

¹⁰ mha beta hie, derei u dietho mu u kevi tha pekie tseishülie, sitse mhakehoupuo nu rei ukoe Ukepenuopfü u kelakelieu die va kezivilietuo.

¹¹ Kekreilamonyü Ukepenuopfü ngukemezhieu, themia peteko kelalie kevi se pesipengushüte,

¹² süu u pethapie u bu mha kesuo shüüko mu kijü vieko kemehou khawa di u kethekerepfü, dietho, mezhü mu Ukepenuopfü khrüprei di kijü hanu lhou tuolieketuo la,

¹³ u bu u siedze kevitho-u süusü Ukepenuopfü mu u Kelakelie kezhatho-u Jisu Khrista zayie chü di mia mhingu chü vorketuou pfhe keba ki.

¹⁴ Puoe u kesuo kheko nunu u rhalie mu u khrü kemesapie puo thuo puo themia kro puo chülietuoü u bu mha kevi pete nu u rhiechülietuo üdi puo kelhou khashü.

¹⁵ Mha hako pushülie; thepfu di tarho mu mia kejo rei pupie kieshülie. Mia puo bu rei u le pesuoketa chü hie.