Tita 1 - Angami Naga CL (Re-edited) Bible (BSI)

Kelukeshü

¹ Paul, Ukepenuopfü kituou mu Ukepenuopfüe kedalieketako kepeleu la mu Ukepenuopfü khrükeprei zho-u medzi di ketho mhasiu la Jisu Khrista apostel chülie,

² süu tijülie kelho Ukepenuopfü thuo nnhiennhie nu pupie ketuo,

³ puotei touki puo dieu zhapu kechü nu pesipengukeshü kechachie kerheiu kemerü la zo, mu hau Ukepenuopfü u Kelakelieu thuo a bu chünu di kha a peleshüwate.

⁴ Leshü hau pie kepele nu vierhe kechü a nuo ketho chüketa Tita ki shü ho: Ukepenuopfü u Puou mu Jisu Khrista u Kelakelieu bu ngukemezhie mu noune kha n tsükelieu chüliecie.

Kreta nu Tita Mhatho

⁵ N bu mhachü tso mo kebako chüketuo la, mu hadzü n ki pukeshü tuoi rünako nu phichüko kedapie ba phrewaketuo la a n khapie Kreta nu bawa.

⁶ Sümia mia bu u pejolie kelhomia, u kimia puo rübei kenyimia, mu puo nuonuoko rei kepelemia di mia bu uko üse rüzhü morei mia die zeya kemomia üdi thawa kemomia morosuo.

⁷ Kehou kepfhemia puoe Ukepenuopfü kituomia puokecü la pejolie kelhomia morosuo; u thuo u medo kechü, u nou meyie mhaitayakezha, zu die chüyakezha, mu mia vütayakezha, siro mha kemehoumia suo,

⁸ derei mia peso nyükecümia, mha kevi u neikezhamia, meciemephrükecümia, kemiathomia, kepecümia mu u kethekerekeliemia morosuo.

⁹ Puo kethodieu kepetha dieko thezetsase thalie morosuo, sidi kepele dzetsa kepetha die puotouu se mia tarhoshülie kevi mu süu vajoketuoko chü kemezhülieketuomia morosuo.

¹⁰ Mia die zeya kemo, diethuodieruo kepu mu mia seyakezhamia kekra tuote mu süko u zhürekepfüko pekuo;

¹¹ uko bu kemekrieta morosuo, uko dietho kemo kemevi ngukelie le di pu zhü kemo dieko se mia petha di kikru kekra kebvü tuote.

¹² Uko donu mia puo, uko siedzekesimia puo thuo pupie kezhü, “Kretamia sü tijü seiyakezha, khunuo kesuo, mecü mu cahuocaya kro puo zo,” si.

¹³ Zhapu süu ketho zo. Hau la no uko kejoko putsaishülie, sitse uko kepele nu metei thalietuo,

¹⁴ di uko bu Judamia kemeduo dze mu ketho-u therhieketa themia dieko sanyü hie.

¹⁵ Kemesako la we mha pete mesa, derei rhuketako tsiu pele kemoko la we mhapuorei kemesa jü. Süko we u nou mu kelekemedoko rei rhu phrete.

¹⁶ Kepu nu zowe uko Ukepenuopfü si üya, derei uko mhathoko nu we puo si mo. Ukoe kerütsekecümia, mia die zeya kemomia, mu mhatho kevi puorei chülie sü mo.