Timothi Kerieu 6 - Angami Naga CL (Re-edited) Bible (BSI)

¹ Mia bu Ukepenuopfü za mu kepetha dieu thaketa keprei la, miadie chü mia vocie khro tuoketa khe bu puo niepuko rhu tseiütsoshü zhücü lelie.

² Puo niepumia kepelemiatacüko bu rei keze kehou nu tsüphrü phreta üdi süko rhu moketa chü hie; sikecüumonyü süko lie chü pevikuolie, uko mhatho geinu kemevi nguliekezhakoe kepelemia mu u kekhriemia zocü la. Mhatho hako pie petha mu hüzhü zolie.

Ketijü Kepetha mu Ketho Kinyi

³ Kehoupuorei kepethadie kekrei se mia petha di u Niepu Jisu Khrista die keviko mu Ukepenuopfü kepele die keviko ze kerheyakemomia,

⁴ mhapuorei si mo zorei komethuo tuoya, siro kenyamia mhie di mha ketso mu die neiü se mia ze keprüli tuoya. Haicü nunu mia ngu u rokecü, kegeikecü, kethakecü, mia lekepesuo parya,

⁵ u noule vi kemo mu ketho-u perhukewa sükoe Ukepenuopfü khrüprei üse u pra u shü puo laüya.

⁶ Ketho, Ukepenuopfü khrüprei nu tuo di u nei sieiketuo sü puo kepra ba phi;

⁷ kekreilamonyü we mhapuorei se kijü nu vor mo, mu we mhapuorei se la pralie lhocü la;

⁸ derei we ucauva mu pfhemenei bakelie sie u nei zo.

⁹ Sirei mhakenyi leyakezhamia te dophi nu, kebie nu, mha kemethuokemeruoko nu, mu u chü pesuowakezha kemengu neiü nu tele di pekawaya.

¹⁰ Kekreilamonyü shükeiraka kemehoue mha kesuo pete bo-u zo, huomia süu mehoumengu di u kepele rei vajopfü tuote, sidi nousuo kekra pie u ze pechüpfü tuote.

Tarhokeshü

¹¹ Derei Ukepenuopfü themiau, no zowe mha hako therhielie; kemiatho, Ukepenuopfü khrükeprei, kepele, kekhrie, shükhreshühiekecü mu thenou kemene whuo zoliecie.

¹² Kepeletsa n rhiechü di keperhielie; sidi kechachie kerheiu theze kemetei tha zolie, süu la n kielie mu no rei zhapumia kekra mhodzünu süu pushüshü vorta zo.

¹³ Kerhei pie peteko ketsü Ukepenuopfü mu Pontia Pilat mhodzünu die kevi zhapu chükeshüu Khrista Jisu mhingu nu, a n bu

¹⁴ u Niepu Jisu Khrista la vor kemochie diekhakeshüko chüüzelie di mia bu süko pejowalie kelho chünu n ki puya ho,

¹⁵ puo kevor sü puo thuo puotei touu nu mia bu ngutuo; puo sü kediko Kediu, siro niepuko mho Niepuu; thejakepfütho-u mu puo rübei kekuotho-u zo.

¹⁶ Puo rübei siaüjütalie kelho-u mu miapuorei penuo volie kelho kezie nu lhou kebau, miapuorei puo ngu mo mu ngu reilie lho; puo bu telhekechachie therhupfü mu kedi chücie. Amen.

¹⁷ Tsie teiu nu mhakenyiko bu u nou rükrie mu u kemerüu pie khrukhre kemo kinyiu gei shü monyü, u bu se u neilieketuo la mephruomevuoi di mha pete pie u tsükezha Ukepenuopfü gei shülienu pucie.

¹⁸ Uko bu mha kevi chülie, mhatho kevi bu kra philie, mephruomevuo zolie, mha pie mia tsü mia za nyü sieilienushücie,

¹⁹ silie liro thiesie la u kinyi kengupie puo mvüdze kemeteiu gei balietuo, mu kerhei ketho-u se thalietuo.

²⁰ Harie Timothi, mha pie n pelekewau se menuo balie. Sidi ketijü die kesikele üyakezha nunu kepar diethuodieruo mha kemesako bie perhuwayakezha dieko therhie zoliecie,

²¹ huomia süu zeya üdi kepele nu kekrü tuote. Ngukemezhie bu nie ze bakelieu chücie.