Timothi Kerieu 5 - Angami Naga CL (Re-edited) Bible (BSI)

Kepelemia gei Chülie Morokesuo

¹ Phichümia gei die kere pucüu monyü sümia ü n puonuo mhie di rüchülie; siro khriesako ü n siezemia mhielie,

² mu thenupfüko ü n zuonuo mhie zolie, rüüko ü n üpfünuo mhielie, n nou mesamezhü tou di.

³ Sami rei sami kethopfüko rhu zolie.

⁴ Derei u nuonuo morei u tsunuo kenyi samipfü we, u nuonuo süko bu u kikruu nu Ukepenuopfü khrükeprei zho se di u thuo u krünuo vaphi lakelie do si rieliecie; Ukepenuopfü mhinguki we sikecü puotou zocü la.

⁵ Sirei thenu sami ketho, u rübei zoketapfü ro Ukepenuopfü kepele zotaya, sidi thevakhinhie u mezhiemelo mu cha sei tuotaya;

⁶ derei thenu sami rügerüzhü puoneipuonyü chüketuopfü we rhei keba nu sia tuota zo.

⁷ Uko pejo molieketuo la die hako pie uko ki pushülie.

⁸ Kehoupuorei puo siezedzürie, mu puo kikru vaphi moketamia, puo kepeleu meliewate, mu pelekemomia ki rei suokuo.

⁹ Samipfü puo cie hiesorou khrota mo mu puo nupfu puo rübei ki nyicümia üro puo kro-u nu puo za thulie;

¹⁰ puo mhatho kevi zhapu kenyi; puo nhicumia theke kesier, rüso peso, kemesako phi khrü, kemezhiekeliemia vaphi, sidi mhatho kevi kheko siedzi chü terü kevormia morosuo.

¹¹ Derei thenu sami kemedzüko we sa hie, kekreilamonyü ukoe chüüzie menguu la Khrista ze kepecieta ro, uko kishükiya chü nyütatuo,

¹² sidi uko die kerieu vakewa la jotatuo.

¹³ Süsie rei ukoe mhachü kemecüdo si di kiü nu whi tuotatuo, siro mhachü mecüketa zo moü sieüsielu chü kho mu ke di pu zhü kemoko pu tuotatuo.

¹⁴ Süla sami kemedzüpfüko bu nyhülie di u nuonuo nyilie, u kitiekinu meholie, sidi u ngumvümia thapfüta mokelie we a nei zo.

¹⁵ Tsie zorei huomia rüreita di Satan siemedzi tuoketa la.

¹⁶ Kepelemia kehoupuorei samimiapfü sikecü u kikru nu ba üro puo bu pie kehouu nou penyü mo di puo thuo süko vaphilieliecie; sidi kehouu bu samimiapfü kethoko vaphilie.

¹⁷ Phichümia mha kese menuoyakezhamia, ba hurei mia ki zhapu chü mu pethayakezhamia rhu philie;

¹⁸ kekreilamonyü kethodie nu pucü, “Mithu bu lienyü ketha ki mha pie puo tie pera lho,” siro “Mhakechümia puo zha ngucü zhü,” iya.

¹⁹ Phichümia pejokecü sier zorei mia keniekese si mu nguketa zhapu nyi zo kemosie sanyü hie.

²⁰ Themia kephouma chükewamia mechühou nunu kerhieshücie, sitse kekreimia rei michielietuo.

²¹ A n bu mhasi kemecie kemonu mia lepesuo di mhachüta molieketuo la Ukepenuopfü mu Khrista Jisu siro teigeidielie kedakelieko mhodzünu a die haha khashüzhü ho, miapuorei yapie pekrei mo di hako chücie.

²² Rükri rühe pie miapuorei tsü hie, mu kekreimia ze kephouma thoko chü hie; n thuo n kha kemesa se balie.

²³ Dzü rübei krie hie, derei n vadi la mu tsiemelie mhachü baketa la khubezu keduo yopuo sa selie.

²⁴ Mia huo kephouma we meyiemeluopfü baya, sidi u mhodzü kepejo nu votaya, sirei huomia kephouma we kenuotsanu silieya.

²⁵ Sütuoi mha kevi kechü rei pete mhodzünu meyiemeluocü nyi, mu si zo kemoko zorei rüshütalie kenjü.