Timothi Kerieu 4 - Angami Naga CL (Re-edited) Bible (BSI)

Ketijü Kepetha Sierketuo

¹ Sirei Ruopfüe pu kemecie toukeshü thiesie huomia kepele vawa di u ketsikezha ruopfüko mu terhuo kerüzhüko kepetha dieko rünyütatuo,

² süko kethera di medaketuoko zo, uko noudonoule sü thegi thepie ba di pie chiekewa mhie.

³ Süko mia bu kesekeri hienu, siro Ukepenuopfüe puo kepeleko mu ketho-u siketako bu puo thezie di se u ca chünu di chükeshü kecücako cü hienu sietuo:

⁴ Ukepenuopfü mhachükeshü pete vi phre zo, mu mhakehoupuorei puo tshe di lielieta ro thi suo,

⁵ kekreilamonyü Ukepenuopfü dieu mu kecha la süu kenyü kemesaliete.

Jisu Khrista Lietho Kevimia

⁶ No tahitarhokecü hako pie u siezedzürieko nou neketeshü ro, no medzituoketa kepele die mu kepethadie keviko thuo n thekepie n bu Khrista Jisu lietho kevimia chülietuo.

⁷ Derei mesa kemo dzeko mu miakimianuo ketsapfüko dzeko ze mhapuorei chü hie. Ukepenuopfü khrüpreitsa n thuo n kephra seilie.

⁸ Kekreilamonyü umo kezhaphreikecü we keduo yopuo kemevi zie mo, derei Ukepenuopfü khrüpreitsa we mha pete la kemevi ba, sünu tsie mu thiesie la rei kerhei bacü la.

⁹ Die kepu hau ketho zo mu ze ketseiketsolie zhü.

¹⁰ Rheituoyakezhau Ukepenuopfü gei hie kemerü pie bakelie la, hie hie teitsochü mhachü kemezhie tuo zo, puo sü themia pete Kelakelieu zo, sirei kemiathoko la pekuo.

¹¹ Hako kepu mu kepetha ba zolie.

¹² No ü khriesa zoluo üdi miapuorei bu n meleketa chü hie, derei kepeleko mhodzüki n diepu nu, n zhorüli nu, kekhrie nu, kepele nu mu kemesa nu thakie puo chülie.

¹³ A vor kemochie, kethodieu phrüpie mia kie, mia tahitarho mu mia petha ba zolie.

¹⁴ Phichüko u dzie yhapie n gei keshü ki, siedzedie mu ngukemezhie mhaphruo n tsükeshüu se mo ba hie.

¹⁵ No vi kechüliezhücü mia pete bu silieketuo la hako le terü di chüüze phre zoliecie.

¹⁶ N zhorüli nu mu mia kepetha nu menuo balie. Die hako ze zolie; silie ro no rei mu n die kerünyüko rei kelalietuo.