Timothi Kerieu 3 - Angami Naga CL (Re-edited) Bible (BSI)

Kehou Kepfhemia zhorüli

¹ Diepu hau ketho zo: Kehoupuorei kehou kepfhe lietho chü nyüyakezhau, therhu mhatho menguya.

² Süla kehou kepfhemiae thethapfükemomia, u kimia puo rübei kenyimia, u kethekerekecümia, kemenuomia, rhulie kesümia, mia peso nyüyakezhamia, mia petha toushülie kevimia,

³ zu krie mezeyakemomia, mha kebvüshüyakemomia tsiu menekecümia, mehiemehakemomia mu shükeiraka mehouyakemomia morosuo.

⁴ Puo kikru meza menuolieyakezhamia, mhakehoupuo nu rei puo nuonuoko kekhase bakeliemia morosuo,

⁵ mhanuü miapuonie puo kikru meza menuolieya mo üro, puo kikidi Ukepenuopfü kehouu mezalie ta?

⁶ Kepele nu miasamia bu chü suo, puo kemiako sieta di te satan tha nu letalie vi.

⁷ Sizomonyü puo bu miathapfü mu terhuokesuou ratho nu puo makelie keprei la chazoumia mhodzünu rei therhukepfümia morosuo.

Dikonmia Zhorüli

⁸ Sütuoi dikonmia rei mhale pesouyakezhamia, die kenietayakemomia, zu die chütakemomia, shükeiraka mehouyakemomia morosuo,

⁹ u nou mezhü di kepele u ngokecüu thezetsase tuoyakezhamia morosuo.

¹⁰ Uko rüli rie meho perie di u kepejo jü üro u bu dikon chücie.

¹¹ Dikonpfüko rei sümhiei soukecümia, mia thameleyakemomia; menuo mu mha pete nu diethoyakezhamiapfü morosuo.

¹² Dikonmia u kimia puo rübei kenyimia, u nuonuo mu u kikru meza menuolieyakezhamia morosuo;

¹³ siro dikon chü menuokeliemia u tha vilie di Khrista Jisu kitsa u kepeleu nu thepfu selieya.

U Ngokecü U Nanyüu

¹⁴ A n ki vor zikecü mengu zo, derei a die hako thupie n ki shücü, siro

¹⁵ mhanuü a menyhuota rei Ukepenuopfü kikruu nu kebamia u zho kimhie ba morosuo shiü n bu si nyü, ki süu rhei tuoyakezha Ukepenuopfü kehouu, ketho-u toupfü keba co-u zo;

¹⁶ u kepele u ngokecü hau zhaü molie kenjü: Chüüzie nunu puo pie pengushü, ruopfü nu mezhülie, teigeidielieko bu ngu, Judakemomia donu pu pesishü, kijü vala ketso puo pelelie, zapuzayie nunu puo ze khote.