Timothi Kenieu 4 - Angami Naga CL (Re-edited) Bible (BSI)

¹ A Ukepenuopfü, tsiu Khrista Jisu, kerhei mu kesiako ketsoketuou, puo vortuo ükezhü mu puo kedi chüketuou la, n ki die hau pu beishü ho:

² Dieu pie petha ba zolie; puotei vi rei mo rei, shükhreshühie mu n teitsochü mia petha di mia rüchüpie mia bu lielie, kerhieshülie, mia chü kethepfushülie.

³ Kekreilamonyü puotei puo vorzhie, kepele die puotoukecü lie mvütaketuo, derei u nyie kemeso la ukoe u thuo u krukecü kepethamia pfhü kengulietuo.

⁴ Sidi ketho-u rünyükelieu monyü rüreise ketho kemo dzetsa votatuo.

⁵ Derei no zowe n melou meciephrüi balie, kemezhiekecüko nu rei shügeshühielie, dieliekevi kepetha lietho chü balie, no lietho chütuoü kebau chü tsei zolie.

⁶ A zowe ruosuo kechü vie puo tuoi a zie rei kengeshüwatuoü bate, tsiu a tuotaketuo tei rei tso bate.

⁷ A keperhiekecü nu keperhie pevi seshüte, a ta vo tsowate, a kepeleu se ba tsoliete.

⁸ Tsie yawinu kemiatho tsüreu a la khapie zhüwate, süu kemiatho capiu, Niepuu thuo teisozha sünhie pie a tsütuo, mu pie a rübei zomonyü puo kevor mengu keba pete tsü phretuo.

Paul Puo Thuo Puo la Kepu Die

⁹ No a ki vor mhaiketuo le beicie,

¹⁰ kekreilamonyü Demae tsiedo kijü hau va khrieta di a khawa di Thesalonika nu vote; Kresen-e Galatia nu vote, Tita Dalmatia nu vote.

¹¹ Luk rübei a ze keba zote. No Mark rei zelie di vorcie, a lietho nu puo kekhruohilie zotuocü la.

¹² A Tukika ketsepie Efesa nu shüwate.

¹³ No vorkecü ki, Troa nu a boulie khapie Karpo dzie nu kebau se vorliecie, a leshüdako rei, ba hurei chüzhü geinu kethuko se vorliecie.

¹⁴ Rükreiyakezhau Alexander a gei mha kesuo se chüshü, puo chüwaketako la Niepuu thuo puo zhadavüshütuo.

¹⁵ No rei puo gei n kireilie, puo u kepetha dieu petsou phiyacü la.

¹⁶ A thuo sie a zha pu kerieu va miapuorei a yapie mo, sicüumonyü mia pete a khawa. Süu la uko pejota mo üthienyü.

¹⁷ Derei Niepuu thuo a ze tha di kekuo khapie a tsü, sidi a bu dieu pu tseipie Judakemoko pete bu rei rünyülie. Sidi losha me nunu rei a kelashü.

¹⁸ Niepuu thuo a pie teigei kedi nu shülieketuo la a petsoukezha mha kesuo pete nunu a kelashütuo. Puo bu telhekechachie zayieu chüliecie! Amen.

Kelukeshü Thelako

¹⁹ Priskila mu Akila tsiu Onesifora kikruu kelushü ho.

²⁰ Erasta bu Korint nu bate; Trofima mhachüketa la a puo bu Mileta nu bate.

²¹ No teisei mhodzü a ki vorketuo le beicie. Eubulo n kelushü ho, sütuoi Puden, Lino mu Klaudia, tsiu kepelemia u kezeko pete n kelushü ho.

²² Niepuu bu n ruopfü ze tuolie. Ngukemezhie bu n ze tuoliecie.