Timothi Kenieu 3 - Angami Naga CL (Re-edited) Bible (BSI)

Teisozha Thelako

¹ Siro teisozha thelatsa u dzükezei chü zokecü tei vorketuo rükralie.

² Sükisü themia u thuo u zhazhü kepfhü, raka kemehou, kemelha, kemiako, mia thepesuo, u krü die ze kemvü, mia thezie kemo, mesa kemo,

³ noushünouzhie kejü, mia kejo vakemvü, mia tha mia mele, u kekhalieya kemo, u zho kesuo, mha kevi rütsekecü,

⁴ kelhiekecü, mia die rünyü kemo, komethuo; tsiu Ukepenuopfü khriekecüu ki rei u thuo u nei u nyü chü nyükuokecü siertuo,

⁵ süko chazoutsa Ukepenuopfü khrükeprei meviva, derei kekuo ketho-u melieya. Sükemhieko therhietalie.

⁶ Süko huomia goumelie mia kinu vo di mhale kemo u kephoumako la u keraketuo thenuko, u mengu neiüko bu u meshü ze tuoketako selietatuo,

⁷ süko mia bu u petha sei tuoya, derei mhakipuorei ketho-u silieketuo nu tuoya mo.

⁸ Thiedzü Jani mu Jambri unie Mosa petsou sieketa tuoi, themia hako rei u nou mha kesuo tuo, kepeleu meviva, siro ketho-u petsou sa.

⁹ Derei süko ta pecie ba zo volie lho, kekreilamonyü themia sünie tuoi, themia pete uko kesuo ngu parta zotuocü la.

Paul Timothi Tarhokeshü

¹⁰ Sirei no zo we a kepetha die, a zho, a kelhou nu mharü, a kepele, a shükhreshühiekecü, a mia kekhrie, a metei thakelie,

¹¹ a kepechü ngukelieko, Antiok, Ikonia mu Lustra nu a gei pfürkecü mezhieko ngushüte. Kiderei kemezhieshü shi! Sirei süko pete nu Niepuu thuo a kelashü.

¹² Ketho zo, themia kehoupuorei Khrista Jisu ze puo chü di lhou nyüyakezhau mia bu puo pechüpenyü zotuo.

¹³ Derei kerüzhümiako tsiu mia seyakezhako u thuo u seya, mu kekreimia rei seya, süko suo miemietatuo.

¹⁴ Derei no zowe ketho-u pie n pethashüwaketa tuoi peletsapfü tha zolie, no zo we suomia kinu mha süko silie shiü si ba zocü la,

¹⁵ mu no zowe n nhicu nunu kemesa kethodieko silie di süu thuo n pethapie n bu kepele nu Khrista Jisu geinu kepar kelakelieu ngulie kevi chülie.

¹⁶ Kethodieko pete Ukepenuopfü kinu haphra par zo mu süu mia kepetha la, mia tahitarhoketuo la, mia chü kemezhüketuo la, tsiu mia ketshüpie kethotsa shülieketuo la zo,

¹⁷ sidi Ukepenuopfü themia chüketa kehoupuorei chü pevipie mhatho kevi kheko chülieya.