Timothi Kenieu 2 - Angami Naga CL (Re-edited) Bible (BSI)

Jisu Khrista Chüpahi Kevimia

¹ Süla a nuo, Khrista Jisu geinu kepar ngukemezhie nunu metei thalie,

² mu no zhapumia kekra mhodzünu a die sikelieko, no süko pie pelelie kesümia mu mia kekreimia rei pethashülie kevimia pele lashülie.

³ Khrista Jisu chüpahi kevimia puo mhiei keze kemezhielie.

⁴ Themia kehoupuorei chüpahi chü ketuo ki mha kekrei chü u kenyha saya mo; puo bu chüpahi chütuo üdi puo za rukelie kezhau nei chülieketuo la.

⁵ Sizomonyü rüzhümia puorei rüzhüzho medzi mo di kevi zhakhra ngulieya mo.

⁶ Puo rhiechü mhachüyakezha liecieu puo lieyieu nu puo si ngu rie zhü.

⁷ A n ki pukeshüko leshücie, Niepuu n bu süko caülako silieketuo chüshütuo.

⁸ Jisu Khrista, kesia nunu rheisieketa, David yieu rükrashücie, süusü a dieliekeviu zo,

⁹ süu la kejo kechümia tuoi mia bu a khese kemezhie hi tuokecü zo. Derei Ukepenuopfü dieu we phawa mo zo.

¹⁰ Süla kedalieketako la a mhakehoupuo nu rei shügeshühiepfü tuoya, sidi uko bu rei Khrista Jisu geinu kevor kelakelieu ngulie di kechachie zayie chülieketuo la.

¹¹ Pukeshü hau ketho tou zo: We puo ze sia ro, we puo ze di rhei reilietuo;

¹² we shügeshühielie ro, we rei puo ze kedi chütuo; we puo melieta ro, puo rei u meliewatuo;

¹³ we dietho mo zorei, puo we dietho sei zotuo, kekreilamonyü puo thuo puo melielie kenjü.

Chülie Kesü Liethomia

¹⁴ Hau pie uko ki pu lashücie, mu Ukepenuopfü mhodzünu uko bu keprüli hienu tarhoshücie, sikecüe mevikelieu monyü kerünyüko chü pesuowaya.

¹⁵ Ukepenuopfü bu no ü puo medomia ülieketuo la puo mhodzünu n rachülie, puo mhatho-u la mengata mo zocü liethomia puo chülie, puotou nunu ketho dieu kezashülie.

¹⁶ Siro mesa kemo diethuodieruoko therhielie, kekreilamonyü süu themia cha thapie ketho le mo miemietaya,

¹⁷ mu uko die-e kechü puo tuoi thuo miemietatuo. Süko donu Huminia mu Fileta rei sate,

¹⁸ unie ketho-u vajowa di rheilasieketuo üse tseita üdi pu tuote. Sidi unie huomia kepele thurhuowatazhie.

¹⁹ Derei Ukepenuopfü puo bodekeshüu we metei ba zo, mu süu gei: “Niepuu puo thuo puo vieko si ba,” mu “Kehoupuorei Niepuu za kiekeliemia mha kesuo kechü therhietacie,” icü thupie zhü.

²⁰ Siro ki kezha nu zorei mhabou kekreicü baya; suna mu rakachü pie kechü rübei mo, derei sei mu rünyo pie chüya; huo se therhu mhatho chü tsiu huo we si zo mo.

²¹ Kehoupuorei a pukeshüko nu u thuo u chü kemesakeliemia, sümia chüpie therhukepfü, chü kemesakelie, ki niepuu bu se mhachülie kesü, mhatho kevi kheko la kese mhabouko chülietuo.

²² Ta themia lhounyü ki menguko therhie zolie, sidi u nou mesa di Niepuu za kieyakezhako ze di kemiatho, kepele, kekhrie mu kezekevi whuo volie.

²³ Derei mhale kemo diepu mu kemethuo nu keprülikecüko ze mhapuorei chü hie, süko kegei prushüyakecü no rei si ba ze ru.

²⁴ Niepuu liethomia keprüli suo, derei kehoupuo gei rei tseiüvi, mia petha si mu shügeshühielie,

²⁵ thenou kemene se di puo petsouyakezhamia tarholie. Ukepenuopfü puotei kevi puo khapie süko tsü di uko bu rei thenou kedi lalie di ketho-u silieketuo chülie kevi la,

²⁶ sidi süko u nou mezhü lalie di terhuokesuou ratho nunu ta lalietuo.