Thesaloniako Kerieu 4 - Angami Naga CL (Re-edited) Bible (BSI)

Ukepenuopfü Nei Kechü Kelhou

¹ Cüsie hie kezeko, hie Niepuu Jisu nunu nie ki cha mu nie hüshüya, süusü, nie hie kinu sikelie tuoi kimhiei di lhou morosuo shi mu Ukepenuopfü nei kechü kelhou nu tuolietuo shicü (nie rei sicü nu lhouya), mu sü kezie rei chülienushüya.

² Hie Niepuu Jisu nunu nie pethakeshüko nie si ba zocü la.

³ Siro hau Ukepenuopfü medo-u zo, nie mesa bakelie: süusü pierüü chü molie;

⁴ di nie mia puopuokecü bu u thuo u mo kekhakerepie mesa mu se ketherhu sikelieu zo,

⁵ Judakemomia Ukepenuopfü si kemoko tuoi chüüphou menguu nunu lhouta hie;

⁶ sidi haikecü nu mia puo bu rei puo kezeu morei kezepfü gei puotou kemo chü morei pese hie, kekreilamonyü hie pedzüperie nie ki pu mu tarho menuokeshü tuoi Niepuu thuo mha hako pete nu puo khepuyacü la.

⁷ Kekreilamonyü Ukepenuopfü u bu mesa mo tuonu monyü u chü kemesalieketuo la u kiekelie zo.

⁸ Süla kehoupuorei hau meliekewamia themia monyü puo Kemesa Ruopfü khapie nie ketsüu Ukepenuopfü meliekewa zo.

⁹ Siro siezedzürie huoniehuo khriekecü dze we hie bu thupie nie tsü mo rei vi, kekreilamonyü Ukepenuopfü thuo nie bu huoniehuo khrielieketuo pie nie pethashüwate.

¹⁰ Ketho zo, nie Makedonia nu keba nie üpfüko mu kezemia pete khrie baya ze. Derei hie khrieko, hie nie bu süu chükechü miemielienu nie hüshüya,

¹¹ siro hie nie ki kepu tuoi nie kemekrie di lhoukelie ralie, nie thuo nie mhatho-u chülie, tsiu nie dzie se mhachülie,

¹² sitse nie chazoumia mhodzünu zivi tuolietuo mu mia merü di lhouta lho.

Niepuu La Vorketuo

¹³ Derei hie kezeko, nie bu zeketako dze si mo ba nyü mo, süusü nie bu kekreimia u siedze kejüko tuoi nie nousuo tuo molieketuo la.

¹⁴ Siro we Jisu siaketa mu lasieketa peleya liro, süsütuoi Jisu kitsa tuo di siaketako rei Ukepenuopfüe puo sa ze votatuo.

¹⁵ Hau la hie Niepuu dieu pie nie ki puya, süusü we rhei ba di Niepuu la vorkecü tsoketuoko we zeketako mhodzü rielie lho zo.

¹⁶ Kekreilamonyü teigeidielie kezhau kuokelie pfhe chü di shieshü mu Ukepenuopfü ketsüu khoushü tse Niepuu teigei nu ker zotuo, sitse Khrista kitsa tuo di siaketako rhei sieta rietuo.

¹⁷ Süsie we rhei ba, mu baluocüko rei süko ze kimhou geinu chüse kho teikhrie nunu Niepuu ze kesetuo; sidi we Niepuu ze sei tuotatuo.

¹⁸ Süla die hako pie huoniehuo nou thupeluo baliecie.