Thesaloniako Kerieu 2 - Angami Naga CL (Re-edited) Bible (BSI)

Thesalonika nu Paul Mhatho

¹ Siro hie siezedzürieko, hie nie ki kevor thedo chüta mocü nie thuo si ba,

² sirei hadzü hie Filipi nu kemezhiekelie mu hie pese phicü nie si zo, hie úko Kepenuopfü la kethepfu ngulie di keziekere nu rei nie ki Ukepenuopfü dieliekeviu pie pushü.

³ Hie nie hükezha ha nie setuoü morei mesa kemo kele nu morei nie kedotuo üdi mo,

⁴ derei Ukepenuopfü thuo hie le pevi di dieliekeviu pie hie peleshüketuo puo medoketa la, hie themia nei chütuo üdi monyü Ukepenuopfü nei chütuo üdi die puya, puo uko melou dojüyie ru.

⁵ Nie rei si ba, mu Ukepenuopfü thuo hie zhapuu chüya, hie mhakipuorei mia kese dieko pu vor mo, morei puo mevi chü di mha rei mehou tuo mo;

⁶ morei hie themia kinu thetshe pfhü mo, nie kinu rei morei kekreimia kinu shierei,

⁷ süu hie rei Khrista apostelko tuoi nie ki mha chalie vi zo ürei. Derei hie nie donu keba ki menenuoi miazuonuoe u nuonuoko ketheke tuoishü zo.

⁸ Sidi nie khrie phicü la Ukepenuopfü dieliekeviu pie nie ze kezaketuo rübei zomonyü nie la hie kelhou rei sa khashütuo üsie zo, kekreilamonyü nie-e hie khriekepfüthomia chüte.

⁹ Kezeko, nie rei hie mhatho mu hie mezhie rükra batuo, hie Ukepenuopfü dieliekeviu pie nie ki zhapu chükecü ki nie perewa molieketuo la thevakhinhie mhachü rükhrerüyi zo.

¹⁰ Nie kepeleko mhodzünu hie zho mesa mu mezhü tsiu pejolie kelho chü zokeshü nie rei mu Ukepenuopfü rei zhapuko zo.

¹¹ Nie rei si ba, miapuonuoe u nuonuo gei chükezha tuoi hie nie mia puopuo gei chüshü zo,

¹² süu hie nie ki cha beiya, nie bu lielie kesü kelhou lhoulienu di Ukepenuopfüe nie kiepie puo kedi tsiu zayieu nu shülieketa la, hie nie tarho mu nie chü kethepfushüya.

¹³ Siro nie hie kinu Ukepenuopfü dieu rünyülie di liekelie ki süu üse themia die ü monyü Ukepenuopfü die tou üdi liekelie la hie Ukepenuopfü thezie sei baya, süue nie kepeleko nou nu mhachüya.

¹⁴ Süla hie kezeko, nie rei Judia nu Khrista Jisu la Ukepenuopfü kehou chüketako dorielielie, süko Judako kinu kemezhiekelie tuoi, nieko rei nie thuo nie ramia dzie nu kemezhielie,

¹⁵ sükoe Niepuu Jisu mu siedzekesiko rei dukhriwa, siro hie rei whuowa, uko Ukepenuopfü nei kemo chü tsiu mia pete petsou tuote,

¹⁶ sidi Judakemoko bu kelakelie ngulie lhoü hie bu uko ki die pukecü kha. Hamhie di uko kephoumako chü tsei tuote; mu Ukepenuopfü noupfhü rei vo uko tsote.

Paul Thesaloniako Ki Vo Nyücü

¹⁷ Kezeko, zopuoki hie mo-u nu nie therhieketa la hie bu merünuomia chüte, thenoutsa we si mo, hie kemengu sü nie zie ngushü nyüthor tuote.

¹⁸ Hie nie ki vor nyü tuo zo, a Paul, va puo monyü sü kezie rei zotuo üsie, derei Satan thuo hie cha khawate.

¹⁹ Kekreilamonyü u Niepuu Jisu kevor ki puo mhodzünu hie kemerü morei kenei morei kemholielie kevi tsüre sü nieko ha mo üme?

²⁰ Ketho, nie sü hie zayie mu hie keneiko zo!