Thesaloniako Kenieu 3 - Angami Naga CL (Re-edited) Bible (BSI)

Kecha Kemengu

¹ Thela nu, hie siezedzürieko, hieko la cha bacie, sitse Niepuu dieu nie donu chükelie mhiei ta rükri volietuo; mu kehourapuorei zayie chülietuo,

² tsiu hie rei themia kesuo mu kerüzhüko kinu tapralietuo, pete rei kepelemia zo mie ru.

³ Derei Niepuu dietho zo, puo thuo nie chü kemeteishü mu kerüzhüu kinu nie rüguose balietuo.

⁴ Tsiu hie Niepuu nunu nieko gei thepfu ba zo, süusü hie diekhakeshüko nie chüya mu chü vo zotuokecü la.

⁵ Niepuu bu nieko nou rükhiese Ukepenuopfü kekhrieu mu Khrista shügeshühiekelieu kitsa voliecie.

Kemecü Pejokeshü

⁶ Hie khrieko, hie Niepuu Jisu Khrista za nunu die khashüya, süu nieko kepelemia kehoupuorei hie kinu ngukelie zho-u medzi mo di mhachü mecü kebako therhieliecie.

⁷ Nie thuo hie dorielielie morokesuo si ba; hie nie donu keba ki mecü chie mocü la,

⁸ mu hie puoma chü mo di mia puo niekhrüda rei cülie mo, derei nieko mia puo pie rei chüwa nyü kemo la hie thevakhinhie rei mhachü rükhrerüyi zo.

⁹ Süusü hie va liecükecü puotou momu idi monyü nie bu hie dorielielieketuo la thapie kiekeshü zo.

¹⁰ Hie nieko ze keba ki rei die hau pushü: Kehoupuorei mhachü nyü kemo-u bu mhacü rei hie.

¹¹ Kekreilamonyü hie sikelie nie donu huomia mhachü mecü, di kemerei meviva di kho mu ke tuoya üsi.

¹² Themia sü kemhiemia bu rübie di u thuo u va kracünukecü hie die khashüya mu Niepuu Jisu Khrista nunu tarho sashüya.

¹³ Derei hie siezedzürieko, nieko zowe mha kevi kechü nu nie shüshüta hiecie.

¹⁴ Themia kehoupuorei leshü khuthu hau geinu thukeshü hie die zeya kemomia, nie sümia si pie balie di puo bu mengalieketuo la puo ze mhapuorei chü hie.

¹⁵ Sirei puo üse nie ngumvümia mhie zota hie, derei kepelemia puo mhie di tarholie.

Theja Kecha

¹⁶ Siro vitho Niepuu bu kehoukipuorei mu mhakehoupuo nu rei nouneu khapie nie tsücie. Niepuu bu nie peteko ze tuoliecie.

¹⁷ A Paul, kelukeshü leshü hau a thuo a dzie üse thushü ho. Hauha a leshü pete nu zasi puote; a hamhie di thuya.

¹⁸ U Niepuu Jisu Khrista ngukemezhieu bu nie pete ze tuoliecie.