Thesaloniako Kenieu 2 - Angami Naga CL (Re-edited) Bible (BSI)

Thezho Rünyü Kemo-u

¹ Siro hie siezedzürieko, u Niepu Jisu Khrista la vorketuo mu uko keze puo mhodzünu kenguketuo dze, hie nie ki chaya,

² ruopfü puo la morei mia die la morei leshü thukeshü puo la üdi Niepuu teisozhau vorta ükecü die se nie hüwa di nie nou kehoukeruo chü bata hiecie.

³ Miapuorei bu mhakehoupuo nu rei nieko sewa hie; kerüzhakecüu, mu thezho sanyü kemo-u sier perietuo, süu kataketuou mia mhinguchü par kemochie teisozha süu vorlie lhocü la.

⁴ Puo terhuo ükezha morei rüsuoyakezha vieko pete petsou di puo thuo puo chü pezhapie süko mho shütuo, siro puo Ukepenuopfü rüsuokiu nu rei zo le balietuo mu puo thuo puo üse Ukepenuopfü ütatuo.

⁵ A hadzü nieko ze keba ki mha hako dze pushükecü nieko siele mote me?

⁶ Siro puo bu puotei tou ki parlieketuo la mha kikecüpuoe tsie puo khase ba shi nie si ba.

⁷ Kekreilamonyü thezho sanyükemo-u kepekhreko chü bate, derei puokhapuodei se kebau chü periewatuo.

⁸ Süsie nu thezho sanyükemo-u mia mhingu chü siertuo, Niepuu Jisu tie nunu kepar thesü üse süu penyüwatuo mu puo kevor pengukeshüu thuo puo pekapejüwatuo.

⁹ Thezho sanyükemo-u Satan kekuo se di, zasiko, ketho kemo u ngoko chü mia kietuo,

¹⁰ mu kerüzhü zho kekra se katatuoükezhüko seketsituo, kekreilamonyü süko ketho-u khrielie di kelalietuo ücü chü mvütakecü la.

¹¹ Ukepenuopfüe hau la puo mevivacü kezha se puo ketsepie uko ki shü di uko bu ketijü peletatuo,

¹² ketho-u pele mvü di miatho kemo u neiyakezhako pete pejowatuo.

Kelalietuoü Kedakelie

¹³ Derei Niepuu khriekepfü hie kezeko, hie nie la Ukepenuopfü thezie sei tuo zhüte, kekreilamonyü Ruopfüu bu nie chü kemesakelie mu nie bu ketho-u pelekelie geinu nie bu kelalieketa puo silie keriemia chütuo üdi Ukepenuopfü thuo kedapie tuoketa la.

¹⁴ Hau la hie pu ketuo dieliekeviu geinu puo thuo nie kieliete, sidi nie bu rei u Niepu Jisu Khrista zayieu nyilieketuo la.

¹⁵ Süla hie kezeko, hie tie nunu rei mu leshü khuthu nunu rei nie pethakeshü zhoko se kemetei mu chüsechü ba zolie.

¹⁶ Siro u Niepuu Jisu Khrista mu Ukepenuopfü u Puou, süusü u khriekeshüu mu u ngukemezhieu la kechachie thenou keluo siro u siedze kevi kha u ketsüu bu,

¹⁷ nie nou thupeluoshü, chü kethepfushü, siro mhathomhachü mu diepudieshü kevi kheko nu nie chü pekuo sashücie.