Thekrü 5 - Angami Naga CL (Re-edited) Bible (BSI)

Ngumezhieshünu Kecha

¹ He-i Jihova, kedipuo hieko gei vor shikecü, rükrashüyi, mehoshüyi, sidi hie kemengakecü leshüyi!

² Hie kayieko sikemomia tsüwate, hie kiko pie solhimia tsüwate.

³ Hiekoe merünuomia, upuonuo kejümia chüte; hie zuonuoe samimiapfü mhiete.

⁴ Hie dzü kekrie ma su morosuote; hie sei rei khrü morosuote.

⁵ Vocie pie hie vo gei shü di hie bu kemezhie phite; hie hie nyiete, kerülei pie hie tsü mo.

⁶ Niekhrüda cü pevülietuo üdi hie Ijiptmia tsiu Asiriamia ze kepfhekhowa.

⁷ Hie puonuoko phoumawa; uko tuo mote, sidi hie bu uko kephouma pfüte.

⁸ Kediemia hie mho dite; miapuorei uko dzie nunu hie shüphralieketuo jüte.

⁹ Hie kerheiro pie kemichie nu phi di hie niekhrüda nguya; rayha nu zhiechau la.

¹⁰ Pekriekecü bu u the di hie zhü teipie miphu ketei tuoite.

¹¹ Zion nu thenupfümia, tsiu Juda nadiko nu rüü phouseko shüwa.

¹² Kedinuoko pie gouwa; phichümia rhukecü tuo mo.

¹³ Khriesako kemvü chüpie mhage, thepfunuoko seide pfü di pevüvüte.

¹⁴ Nadi kharu nu phichümia ba sa mote, khriesamia tsali chü sa mote.

¹⁵ Hie nou keneiu tseite; hie dowhuo keba pie thekrü chüwate.

¹⁶ Hie tsü gei keditsüreu tetsute; hie we ce, chülietie, hie phoumawaketa la!

¹⁷ Hau la hie nou thachüte, hau la hie mhi merüte.

¹⁸ Zion kijüthouu, ruozhüketa la; meseru sügei rühou tuote.

¹⁹ Derei no we, he-i Jihova, kechachie di baya; n kedi-e thephou pete nu baya.

²⁰ Kiüdi no hie rükra mo tseita ga? No kiüdi teisozha kekra hie khawata ga?

²¹ He-i Jihova; hie teshüpie n kitsa shülieyi, sitse hie lhou lalietuo; thiedzü kemhie hie teisozhako chü kesa lashücie,

²² no hie kha tseiwa, tsiu n nei mothorta zo kemosie.