Thekrü 4 - Angami Naga CL (Re-edited) Bible (BSI)

Zion Siazha Ngukelie

¹ Kikemhie di sunau zeita, siro kimhie di suna kevithopfü rüdite mu! Kemesa tsieko khu ketoupie chaü peteko nu kezakeziwate.

² Zion nuonuo puoma kereko, suna kevipfü ze kemejülie vi! Kimhie di uko pie litho-u thedzie pie kechü rünyoli kemhie üte shi!

³ Meseruko thuo zorei puo nu khapie u nuonuo kemedzüko bu nulieya, derei a themiako u zhosuote, rayha nu ostrik rako tuoite.

⁴ Terhümerükecü la kenunuoko meü vo u me kupfü bate; nhicunuoko niekhrüda cha, derei miapuorei mhapuorei pie uko tsü mo.

⁵ Kecükekrie pie thehethehie chüketuomia chaüko nunu kate; pfhe meriemegekecü dzie kevormia thubuokhruko nu bate.

⁶ Kekreilamonyü a themia mha kesuo kechü siazhau Sodom kephouma siazhau ki zhakuota zo, süue hiepuo kinu pekawa, thedzie puorei puo gei shü morei.

⁷ Puo kedinuokoe pekrie ki rei mesakuo, mithunudzü ki rei krakuo; uko moko ketsie ki rei meteikuo, uko tsüthae safir kemhie.

⁸ Derei tsie we uko zie-e ketsiemizhü ki rei teikuo; chaüko nu mia uko si mote. Uko zhü uko ru dapfü bate; tsiu sei kemhie sotote.

⁹ Zhiecha bu u dukhrikewamiae khe di siakecümia ki vikuo, lie nu puo si vülie mo di u kerheiro jü voketa ki rei.

¹⁰ Mia ngumezhieyakecü thenupfüko dzie thuo u nuonuo pie dzü nu belie; süko pie u kecüca chü, a themiako kaketa nhie.

¹¹ Jihovae puo noupfhü kha tseishü; puoe puo nouyie kereu rushü, sidi Zion nu mi petushü, sidi puo mvüdzeko thewa.

¹² Kijü nu kediko, morei kijü nu kelhoumia miapuorei, u petsoukecümia morei ngumvümia Jerusalem kharuko nu lelietuo ükecü pelelie mo zo.

¹³ Puo siedzekesiko kephouma la, tsiu puo zievoko mha kesuo kechü la, ukoe u donu kemiathomia zie pekrukecü lanu zo.

¹⁴ Uko chaüko nu mhiciemia mhiei yotuo, ukoe thezie pie u thuo u perhuwa, süla miapuorei uko pfheneiko nyülie kenjüte.

¹⁵ Themiako uko pu di, “Tuotalie! Mesa mo,” “Tuotalie, tuotalie! Nyü hie!” Süla uko taketuomia mu rühouketuomia chüte, süla seyieko donu kepu di, “Ukoe hanu tuo salie lhote.”

¹⁶ Jihova thuo uko bie ketsieyawate, puoe uko dze le sa mote; therhu pie zievoko tsü mo, phichüko khriekecü rei chü mo.

¹⁷ Hie mhi-e kemethuo kekhruohi pfhü di merüte; hieko mia kelashülie kenjükecü seyie puo pfhe terü vor.

¹⁸ Uko hie phichako sie pie di khashü mvü, sidi hie bu hie chaüko nu tuo volie kenjüte; hie thela penuo vor bate; hie teisozhako phrüwate; hie thela vortakecü la.

¹⁹ Hie whuo ketuomiakoe teiko gei tsüüra ki ta vikuo; ukoe kijüthouko geinu hie whuo tuoya, ukoe rayha nu hieko rü zhüya.

²⁰ Hie kerhei thesüu, Jihova thuo kenhekelieu, uko kheho nunu teliete, hiekoe puo dze pu di sie, “Puo shükhro nu hie seyieko donu lhoutuo,” iyakezhau.

²¹ N neilie tsiu n noumvülie, he-i Edom nuopfü, Uz kijü nu bayakezhapfü; derei tehieu rei sa keyiepie n ki vortuo; no mezetatuo sidi n thuo methuo zhütatuo.

²² N kesuo kechü siazhau chüshüwate, he-i Zion nuopfü, puoe cüsie n ze vo miadie chü salie lhote; derei puoe n kesuo kechüko siazha chüshütuo, he-i Edom nuopfü; puoe n kephoumako hielashütuo.