Thekrü 3 - Angami Naga CL (Re-edited) Bible (BSI)

Kepenuopfü Ngukemezhie Kechachie Baya

¹ Ae Kepenuopfü nouyie theu geinu kemezhiekecü ngukecü themiau zo;

² puoe a cha tha ze zeibouikecü kezie puorei ba kemonu vorshü;

³ puo a rübei petsou di puo dzie yhashü, teisozha pete, si sei ba tsote.

⁴ Puoe a chü tsiu a zhü bu wetoite, tsiu a ruko bietshebietshawate;

⁵ puoe mha kepfhü tsiu kemezhiekecü bu a petsou mu a houpfüliete;

⁶ puoe a bu kezei nu bate thiedzütho siaketamia tuoi.

⁷ Puoe cakhapie a boliete a talie kenjüte; puoe thegi ro mesi sekecü puo pie a phaliete;

⁸ a kekhruohi cha shiekhouishü zorei, puo a kecha rünyü mote;

⁹ puoe radatsie pie a chako khawate, puoe a cha chü kerüwiwate.

¹⁰ Puoe thega puo tuoi a pfhe zhüte, losha puo rüshü kezhü tuoi;

¹¹ puo a ze cha khie vo di a ciechücierhawate; puoe a chüpie a bu a dzükezei chüte,

¹² puoe puo theü gapie bate, tsiu puo theütsie la a pie kedzieguokecü vie puo chüwate.

¹³ Puoe puo theütsiebou nunu theütsieu ciepie a kevi nu vawate.

¹⁴ Ae a themia peteko krenyü chüte, zhate uko thekre tsaliuta zo.

¹⁵ Puoe mha kepfhü pie a ketshu chüwate; puo a bu tsiena krie di mezete.

¹⁶ Puoe a bu a hu pie tsiesenuo ta, mu a bu mige nu rüphre;

¹⁷ a ruopfüe noune jüte; kenei sü kedipuo shi ae rükra mote;

¹⁸ süla ae sie, “A zayieu tuo mote, tsiu Jihova gei kemerü tuo mote.”

¹⁹ A kemezhiekecü mu a kiükru jüketa lekeshüe tsiena mu chüthesie mhie zo!

²⁰ A ruopfüe süu rükra sei di, a nou nu rünuo kete.

²¹ Derei hau a sie le vorlie, di a kemerü nyilie.

²² Jihova kekhrie rüdirüli kemo-u mhakipuorei jütaya mo, puo u ngukemezhie puo thela jü;

²³ Süko teisoduü kesa sei baya; n kedietho zha zalie.

²⁴ “Jihova sü a yau zo” a ruopfüe siya, “Süla a puo khremerü batuo.”

²⁵ Jihovae puo pfhe bayakezhamia gei tseiüvi, mu puo mengu bayakezhau gei tseiüvishüya.

²⁶ Mia puoe zei-i di Jihova kelakelie pfhe bakelie-e vi.

²⁷ Mia puoe puo khriesarüü ki, vocieu pfükelie-e vi,

²⁸ kemekrie di Niepuu u pie dakeshüu pfükelie,

²⁹ u tie se tsu nyophe nu zhüketau rei, (sita zorei u kemerü ba zo),

³⁰ u dzo kereipie u kevümia tsüshü, mu u pesekecü pie u tshupfülie rei.

³¹ Kekreilamonyü Niepuue kechachie u khawalie lho.

³² Puoe thenou kesuo khashü zorei, puoe ngukemezhie kra phikecü ki ze u ngumezhieshütuo;

³³ kekreilamonyü puoe puoneipuonyü chü di themianuo pechüpenyü morei u nou chü pesuoya mocü la.

³⁴ Kijü nu kediemia pete mia phi khro nu kedewacü ki,

³⁵ Kuokejokejüu mhinguki nu themia mezhüu bie kedikewa ki,

³⁶ mia puo mezhü bie kerüwikewa ki Niepuu süu ngu lho üme?

³⁷ Mhanuü Niepuue süu chüshü mo üro, supuonie süu pushü mu chüshülie vi ga?

³⁸ Keviu rei kesuou rei Kuokejokejüu me nunu par mo üme?

³⁹ U keha kenyi supuonie u kephouma la siazha ngukelie ki panyalie vi ga?

⁴⁰ Úko u chako kimhie ba shiü mehoshü khe, sidi rürei Jihova ki la vor khe.

⁴¹ Úko u melou mu u dzie yhapie teigei Ukepenuopfü ki shülie khe.

⁴² Hie phoumawa tsiu n petsousiete, mu no vashü mote.

⁴³ No nouyie chü dzielie di hie whuo, ngumezhie moto zo di dukhriwa;

⁴⁴ no kimhou puo se n keziliete süla kecha puorei pfüthe volie kenjüte.

⁴⁵ Noe hie chüpie themia donu mha kerhu tsiu kelhoukewa nyopfhü chüwate.

⁴⁶ Hie ngumvümia pete u tie tiehiepie hie petsou;

⁴⁷ kemichie tsiu mha preikecü hie gei vorte, mha vakecü mu kepeka vorte.

⁴⁸ A themia kepeka la a mhidzü kerü nu dzükru tuoite.

⁴⁹ A mhidzü kruzhü zotuo, kerülei jü di,

⁵⁰ Jihova teigei nu mehoshü kemochie si ba zotuo.

⁵¹ A nadi nu thenumia kemedzüko rüli la a mhi-e a nou chü pesuote.

⁵² A ngumvüko puocapuola kejü nu pera kewhuo chü a whuo kemerie chü tuote;

⁵³ ukoe perhei a kelhoupie kheho nu shü, tsiu ketsie kelhoupie a va,

⁵⁴ dzü a tsü mho siete; sitse a sie, “A sü tseite.”

⁵⁵ He-i Jihova, a kheho kesouko nunu n za kieshü;

⁵⁶ noe a pfhe sishüte, “A kekhruohi chakeshü ki n nyieto kegulieta hiecie, derei kerülei kha a tsücie!”

⁵⁷ A n kiekeshü ki no a penuo vor; no a ki, “Michie hiecie,” isi.

⁵⁸ He-i Niepu, no a yapieshüte, noe a kerheiro kelashüte.

⁵⁹ He-i Jihova, noe a gei kekrükeshüko ngushüte; a nyie pepishücie.

⁶⁰ Noe uko kelhiekecüko, tsiu uko a petsoukecüko ngushüte.

⁶¹ He-i Jihova, noe uko a krekecüko, mu a petsoukecüko ngushüte.

⁶² A ngumvüko zhate kenoupu mu mebe di a petsou.

⁶³ Uko ba tsu rei tsiu sietha rei mehoshücie; ukoe a mecha di thepfhe chü.

⁶⁴ He-i Jihova, uko dzie mhatho tuoi uko zhakhra chüshü uko tsücie!

⁶⁵ Thenou kesuo pie uko tsücie; n rüsepie uko gei shücie!

⁶⁶ Jihova teiko khronu n noupfhü se di uko whuo vo uko pekawacie.