Solomon Üzo 8 - Angami Naga CL (Re-edited) Bible (BSI)

¹ He-i no ha bu a prüu mhiecü we, a zuo nudzü nu kecüu ücü we! A chazou nu n ngulie ro, a n meboshütuo, tsiu miapuorei a rütsetalie lho.

² A n cha tha ze a zuo kinu vortuo, mu puo a meziepfükelie kibouu nu. A n bu turaüdzü puore kethengu krietuo.

³ He-i puo dzie puo vitsa a tsü khro, tsiu puo dzie puo zatsa a ciepielietuo.

⁴ A n ki pu beiya, harie Jerusalem nuopfüko, kekhrieu kebvü morei puo kesouwa hie, puo bu puo neilie kemochie!

Kekhrie-e Kesia Kekuo Tuoi Zo

⁵ Rayha nunu parkezhü puo khrieu gei vakhrie pfüketuou supuo ga? Ciephobo-u khronu a n pecoshü, sünu n zuoe n se sier, sünu n penuokeshüpfüe n se siershü.

⁶ A pie n melou nu zasi vükelie mhiekecü, n dzieco nu zasi vükelie mhieliecie; kekhrie-e kuopie kesia mhie zocü la; nouhüe repie mekhru kemhie zo; süu ketue mi mitu zo, puo miü re se.

⁷ Dzü kekra se tshü rei kekhrie tshüwalie kenjü, morei dzüdi rei süu zoupfütalie kenjü. Mhanuü mia puoe puonyapuora pete pie kekhrie khrütuoü rei, süu tseiütso mothorta zotuo.

⁸ Hieko üpfü kecü yopuo ba, mu puoe puo nu pou moluo. Puo dze pu kepar nhie hieko hie üpfü la kedipuo chütie shi?

⁹ Mhanuü hapfüe sozha puo ücü we, hieko puo geinu rakachü kediki kevi puo chülietuomu ru, mhanuü puoe kikha puo ücüwe hieko sedar la pie puo khalietuomu ru.

¹⁰ Ae sozha puo, siro a nue dahou kerükrie tuoi, sitse ae puo mhiki noune se kevormia puo tuoi.

¹¹ Solomon-e Bal-hamon nu khubelie puo ba; puoe khubelieu pie kepfhemia penyiewa; süko mia puopuoe süko si la rakachü nyienyiekecü pfhükelie mese.

¹² A khubelie, a viekecüu, a mhodzüki ba; he-i Solomon-e, nyie puo bacü mese, mu puosi kepfhemia krie kenie bacü mese.

¹³ He-i noe tezieko nu lhou baya, a zekoe n pfhe rünyü baya; a bu süu rünyüshücie.

¹⁴ Kenourheiliecie, a khrieu, mu no thelou morei tekhra nuonuo kijüthou re kevi gei ketuo tuoiliecie!