Solomon Üzo 7 - Angami Naga CL (Re-edited) Bible (BSI)

¹ N phikou pfüketuo kide zivi shi! he-i kedimia nuopfü. N donie-e ketsie puoma kere tuoi, mhachü kesimia mhatho tuoi zo.

² N luoe tehie kemetou khubezu kereikecü jütaya kemo tuoi zo. N vadi-e thoulha pfhü kengupie terhuobiepou sakeba tuoi zo.

³ N nunie-e chüzhie nuonuo kenie, nuobikecü mhie zo.

⁴ N voe tsoke pie kechü tsiepfhe tuoi. N mhinie-e Bat-rabim kharuki Heshbon nu rüzie tuoi. N nyhücae Lebanon nu tsiepfhe Damaska ze kepetsou kebau mhie zo.

⁵ N tsü gei keditsüreu Karmel tuoi, siro n tsüthae meriemegekecü tuoi; süu kediu ketsipie bataya.

Yasapfü mu Yasau Unie Nei Kemhie

⁶ No ha kidepuorei zivi mu u nei shi! he-i kekhriepfü, u noukemvüpfü!

⁷ N kelhoue kukuobopfü tuoi zo, tsiu n nue puophro tuoi zo.

⁸ Ae sie, “A kukuobopfü meli sie di puo co teshülietuo” iya. He-i, n nu bu khube phro tuoitacie, tsiu n thesü bu ciephosi re tuoiliecie.

⁹ No mia mebokecüe khubezu kevithopfü tuoi moukeze-i tsutaya, mia me mia tie bu u neilieya.

¹⁰ Ae a khrieu vie, tsiu puo menguu a gei ba.

¹¹ Vorlie a khrieu, avu keze lieko nu tsu; di rünako nunu rüleilie khe.

¹² Avu khiserüna sielie di khubelieko nu tsu khe, avu khube lhoulie zhü mo mo shi, tsiu khube pou parzhü mo mo shi, siro turaü pou parzhü mo mo shi meho khe, sünu a kekhrie pie n tsütuo.

¹³ Mankrak puore kevi khashü, tsiu hieko kikhako nu nhasi u kenei doneiünei baya, siro kesa rei kewe rei, a sükoü n tsütuoü khapie zhüte, he-i a khrieu.