Solomon Üzo 6 - Angami Naga CL (Re-edited) Bible (BSI)

¹ N khrieu kirapuo vota di, he-i no thenuko donu kezivithopfü? N khrieu rürei kirapuo vota mu? Hie rei n ze puo pfhütuolie!

² A khrieu puo zie nu tsute, kethenguko kezhü nu, tezie nu puo kuoko vachütuoü tsiu terhuobiepouko bie kengutuo üdi tuote.

³ A a khrieu vie, tsiu a khrieu rei a vie; puoe terhuobiepou donu puo kuoko vachüya.

Yasau Yasapfü Ketshe

⁴ A khriepfü, noe Tirza kemhie zivilie, Jerusalem mhiei u nei, chüpahimia pfhelha seketuo tuoi kemerie zolie.

⁵ A kinu n mhi kereiliecie, kekreilamonyü ukoe a penyüliete. N thae Gilid nu temvü kro puo kerkezhü mhiei.

⁶ N hue tekuonuonuo dzürüluwa di praketa mhiei, süko pete nuobi penuolie, siro süko donu nuojü puorei jü.

⁷ N dzoe n ziekeya khro turaü si mhie zo.

⁸ Sünu kedimiapfü hiesorou, tsiu pelipfümia hiethetha ba, siro rüü phouse phrü hulie kelho ba.

⁹ A mekhru vitseikecüpfü puo rübei zo, puo zuo geinu penuo kevor puo kerhu jü, puo khriepfü. Rüünuoko puo ngushü, di uko puoü thejakepfüpfü üshü, kedimiapfüko tsiu pelipfüko rei puo tshe phre.

¹⁰ “Puo kengu khise kemhie, khrü mhie zivi, niaki tuoi mesampoui, siro chüpahimia pfhelha se kemerie chü ketuo mhiekecüpfü ha supuo dimu?”

¹¹ Ae thezhüsi zieu nu, razhau nu nhasi vü ba mo mo shi, khube vü ba mo mo shi, siro turaü pou bata mo mo shikecü mehotuoü tsu.

¹² A letuo kemonu a ruopfüe a chüpie a bu a kedinuou kierbagei kemhieta.

¹³ Larluo, larluo, he-i Shulampfü. Larluo, larluo, sidi hie bu n mehoshüyi. Kiüdi nieko chüpahi kro kenie donu nashüketuo mehokezha chü Shulampfü mehoya ga?