Solomon Üzo 5 - Angami Naga CL (Re-edited) Bible (BSI)

¹ A a tezie nu vorte, a üpfü, a kimia; a mür pie kethengu sa pfhükenguliete, a a mepfhidzü pie mepfhidzüdau sa cüliete; a a thunudzü pie a khubedzü sa krieliete. Cüliecie, a kezeko, krieliecie, mu kekhrie krie mezeliecie.

Kekhoketa la Thenou Kemezhiekecü

² A zetsu, derei a meloue cozhü zo. Rünyüshücie, a khrieu kikha ketou di: “Kikha khrüshü a tsücie, a üpfü, a khriepfü, a mekhru, vi tseicüpfü; kekreilamonyü a tsüe thezei la ciete, siro teizei gei po ketsur a tha tshupfü bate.”

³ A a pfhenei rhuokewau; kimhie di süu se la ta? A a phi khrüwate ru, kimhie di perhu la ta?

⁴ A khrieu puo dzie pie kikha keciekiu nu shü, sitse a noue puo menguta.

⁵ A kikha khrüpie a khrieu tsütuoü sie, sitse a dzie nunu mür potsuta, a dziekinuoko gei mür re kethenguu sü kikha dziecie gei bata.

⁶ A khrieu la kikha khrüshü, sirei a khrieu rüreilie di tuota. Puoe die pukeshü ki a phisiata. A puo pfhü vo, derei puo ngulie mo; a puo kie, derei puo a pfhe khoshü mota.

⁷ Nadi nu rühou ketuo rükhouko a ngulie; süko a vü di a bie kerüzashü, kuda kepfheko a geinu a kewhepfheu se tuota.

⁸ A nie ki pu beiya, he-i Jerusalem nuopfüko, mhanuü nieko a khrieu ngu ro, nieko puo ki pushücie: A kekhrie la phisia bate.

Yasapfüe Yasau Tshekeshü

⁹ N khrieu mia kekreimia kekhrieu ki kedipuo nu vikuo ga? He-i thenumia donu kezivithopfü. N khrieu mia kekreimia kekhrieu ki kedipuo vikuo üdi hie bu pu beinu ga?

¹⁰ A khrieue krapoui, tsiu lhou mezumeze zo, soünyie donu kevitho-u zo.

¹¹ Puo tsüe suna kevithopfü tuoi; puo tha dei se, tsiu shüzha tuoi teilei-i.

¹² Puo mhi-e dzüluo dzü khieki mekhru tuoi zo, mithunudzü pie khrüwa, tsiu puo mese nu ba toutou zo.

¹³ Puo dzoe kethengu dzüko tuoi zo, puore kevi khashü. Puo tie-e terhuobiepou tuoi, mür dzü kevi peposhüya.

¹⁴ Puo bou gei suna mu ketsie puoma kere beril nyü. Puo moe tsoke pie kechü tuoi, mu safir pie ketso.

¹⁵ Puo phi Alabaster co tuoi, puo mvüdzeko suna pie chü. Puo kengue Lebanon tuoi, sedar tuoi vi tsei.

¹⁶ Puo tie-e moukeze, puoe vilotso. Hauha a khrieu mu a zeu zo, he-i Jerusalem nuopfüko.