Solomon Üzo 4 - Angami Naga CL (Re-edited) Bible (BSI)

Yasau Yasapfü Ketshe

¹ Harie, no zivilie, a khriepfü, harie no zivilie, a khriepfü! N ziekeya khro n mhi-e mekhru tuoi zo. N thae Gilid kijüthou gei temvü kro-u keker tuoi zo.

² N hue tekuo umie bewaketa kro puo dzürüluwa di kepar tuoi; süko pete-e nuobi penuoshüya; tsiu süko donu nuojü puorei jü.

³ N tie-e kelo meriemegekecüpfü tuoi, tsiu n tie ngu u nei, n dzoe n ziekeya khronu turaü tuoi zo.

⁴ N voe David kuda pfhe pie puo cha kechü mhie; sügei nyienyiekecü terhümiavimia la pezhü goupie kezha tuoi.

⁵ N nue chüzhie nuobi tuoi, terhuobiepou donu nha cü ketha tuoi.

⁶ Teiso pi par di puokhrü tata kemochie, a mür kijüthou gei tsiu kethengu kijükhru gei votuo.

⁷ No ha zivi tseilie, a khriepfü; n gei thepfü yopuorei tuo mo zo.

⁸ Lebanon nunu a ze vortacie, a kimia, Lebanon nunu a ze vortacie. Amana mezü geinu, Senir mu Hermon mezü geinu, loshabouu nunu, khurhü kijüthouko geinu tuotacie.

⁹ No a nou chü pemvüshüte, a üpfü, a kimia, n mhipie mehoshü kevi nunu, n vo nu cü si yopuo se di a nou chü pemvüshüte.

¹⁰ N kekhrie-e kide zivi shi, a üpfü, a kimia! N kekhrie-e khubezu ki rei kide vikuo shi, tsiu n tier re kethengue kethengu pete ki rei vikuo zo!

¹¹ Harie a kimia, n tie-e mepfhidzü tuoi potata ba; n meü khro mepfhidzü tsiu mithunudzü baya; siro n pfhenei re-e Lebanon re tuoi zo.

¹² Tezie cakhapie kebapfü sü a üpfü zo, a kimia, tezie cakhapie keba, dzüluoki mekawaketa mhie zo.

¹³ N seibokoe nhasi zie nu turaübo, nhasi u keneipfü, hena sa di nard rei ba.

¹⁴ Nard mu safron, kalamus, mu seicü re kevi seibo doneiü pete, mür siro aloes, mha kethengu pete.

¹⁵ Tezie nu dzüluo, kerhei dzükhou, siro Lebanon nu kerüko.

¹⁶ Harie, pesotsa teikhrieu, sieliecie; vorliecie, pekhrotsa teikhrieu! A tezie nu rükhrieshücie, sidi puo re kethenguu bu kru parliecie. A khrieu bu puo zie nu vorliecie, sidi nhasi u keneiko cüliecie.