Solomon Üzo 3 - Angami Naga CL (Re-edited) Bible (BSI)

Yasapfü Mha Medokecü

¹ Theva gei a zhü geinu a khrieyakezhau pfhü, a puo pfhü, derei puo ngulie mo, a puo kie, derei puo a pfhekho mo.

² “A tsie sielie di nadi nu chapfüchaüko nu, mu cha kemeyako nu vo a khrieyakezhau pfhütuo.” A puo pfhü, derei puo ngulie mota.

³ Nadi nu whi tuoyakezha rükhoukoe a ngulie. A süko ki, “Nieko a puo khrieyakezhau ngu mo?”

⁴ A uko pfüthe voketa cha kemonu, ae puo khrieyakezhau ngulieta. A puo teshülie, tsiu a puo ze a zuo kinu, mu puo a meziepfükelie kibou nu vorlie kemochie puo bu tuo mvüta.

⁵ Ae thelou morei chüzhie zanu n ki pu beiya, he-i Jerusalem nuopfüko, kekhrieu kebvü morei puo kesouwa hie, puo neilie kemochie!

Yasau Kevor

⁶ Rayha nunu mikhu co tuoi, mür mu kethengu se puore chü, lhithomia dzie nu ketuo kethengu pete se puore chü kethengu se di, parkezhüu kedipuo ga?

⁷ Harie, süue Solomon kepie barau! Puo khieki kekuomia mia hiesorou tha, sükoe Israel nu kekuomia.

⁸ Süko pete-e zhiecha theze se tsiu terhümiavimia phre, theva gei kemichie la pete rei u do gei u zhiecha khepfü bacü la.

⁹ Kediu Solomon-e puo thuo puo la Lebanon nu sei üse mhapiera chülie.

¹⁰ Puoe rakachü pie süko coko chülie, puo khrotsa suna, puo bako kewhe meriemegekecü, mu kekhrie se puo noukou da. Jerusalem nuopfüko,

¹¹ Tuo praliecie. He-i Jerusalem nuopfüko, mehoshücie, kediu Solomon, puo tsüla, puo zuoe puo thenu kelie nhie chükeshüu, puo nou puo neikecü nhie chükeshüu mehoshücie.