Solomon Üzo 2 - Angami Naga CL (Re-edited) Bible (BSI)

¹ Ae Sharon nyiepou, tsiu razhau nu terhuobiepou zo.

² A khriepfüe rüüko donu bakecü terhuobiepoue zohu donu keba mhie zo.

³ A khrieu sü khriesako donu ba, ciephosi-e ketsa donu keba mhie zo. A nei siei di puo khrükhro baya, mu puo si-e a me nu cü vi.

⁴ Puoe a ze thehe chü keba ki nu vor, mu puoe kekhrie se a gei shü.

⁵ Khubesi pesokewa pie a chü pekuoshücie, ciephosi pie a chü perhoshücie; a kekhrie mengu di mezie batacü la.

⁶ Puo dzie puo vitsa a tsü khro ba, tsiu puo dzie puo zatsae a ciepie ba.

⁷ Ae kethelou morei kechüzhie di n ki pu beiya, he-i Jerusalem nuopfüko: Kekhrieu kebvü morei kesouwa hie puo neilie kemochie.

⁸ A khrieu pfheü! Harie, puoe kijüthouko gei prou tsuryie, kijükhruko gei rülhou tsuryie.

⁹ A khrieu sü thelou morei tekhra nuonuo kemhie zo. Harie, puoe úko dahou sieki tha, khirki nunu meho tha, sei rhitho dorü donunu meho tha.

¹⁰ A khrieu sü die pu di sie a ki, “Sieliecie, a khriepfü, kezivipfü, sidi vortacie;

¹¹ kekreilamonyü harie, teisei teiu tseite, teirüwate mu vote.

¹² Nyiepouko kijüu gei ngu par bate; perako ruoshüyakezha teiu vorte, siro u kijü nu mekhru keruo pfhe si bate.

¹³ Chiedebo gei puosi rüchü bate, siro khube poupar bate; ukoe puore thengukreipfü bate. Sieliecie, a khriepfü, kezivipfü, sidi vortacie.

¹⁴ He-i a mekhru, tsiekrie donu bayakezhau, tsiekrie bu puo whepfükebau, a bu n zie mehoshücie, a bu n pfhe rünyüshüthie, n pfhe rünyü vilie, siro n zie rei zivilie.

¹⁵ Meseruko, meseru nuonuoko, khubelie, bie pesuowayakezhako tewalie, hie khubeko pou batacü la.”

¹⁶ A khrieu sü a vie, a rei puo vie; puoe terhuobiepou donu puo kuoko vachüya.

¹⁷ Teiso pi parlie, tsiu teigei khrüu tuota kemochie, rürei vorlie, a kekhrieu, sidi no thelou morei tekhra Bether kijüthouu gei ketuo tuoiliecie.