Solomon Üzo 1 - Angami Naga CL (Re-edited) Bible (BSI)

Yasapfü mu Jerusalem zeko

¹ Solomon-e zokeshü ütsali kro puo.

² Puo bu puo tie üse a meboshücie! Kekreilamonyü n kekhrie-e khubezu ki rei vikuo.

³ N kenhekecü tierko puore vi, n zae tier lakeshü mhie, süla rüü phouseko n ngu u neiya.

⁴ A teshülie, rükrilie khe. Kediu a ze puo kibouko nu vor. Avu keze u nei mu n geinu thenoumvütuo; avu khubezuko ki rei n kekhrieu rükrakuotuo; kemezhümia n khrieyalie.

⁵ A tei, derei zivi, he-i Jerusalem nuopfüko, kedar pfhekiko tuoi zo, Solomon kinu keyapfheko tuoi zo.

⁶ A mehoterü hie, ae a chü zeicü la, kekreilamonyü niaki-e a phiekewa la. A zuo nuonuokoe a ngu u nei mote; uko a bu khubelieko kepfhepfü chü; derei a thuo a khubelie we pfhelie mote.

⁷ A ki pushüthie, a ruopfü puo neiyakezhau, kirapuo nu n kuoko vachüya, khinhieluo ki n kuoko bu kirapuo zhü rüleiya ga? Kiüdi ae n kuokro nu rühou tuoketayo mhietatuo ga?

⁸ Mhanuü noe thenumia donu kezivithopfü silie mo üro, tekuokro-u phisieko medzi volie, sidi tekuokepfheu pfheki kinu n kuonuoko vachüshülie.

Yasau mu Yasapfü

⁹ A khriepfü, a n pie Faro kierbageiko donu kier thuüpfü ze kemejüshü ho.

¹⁰ Cü puoma kereko n dzo va kezivi, n vo gei suna pienyie kelie.

¹¹ Avu rakachü pie puo donu keshü suna pienyie chüpie n tsütuo.

¹² Kediu puo mizhü khie keba ki, a nard-e puore thengukreishü.

¹³ A kekhrieu sü a mhodzüki mür bou puo mhie zo, süu a nunie donu zhü.

¹⁴ A kekhrieu sü a mhodzüki Engedi lie nu, henapfü poukeba khro puo kemhie zo.

¹⁵ Harie, noe zivilie, a khriepfü, harie, noe zivilie, n mhi-e mekhru mhi zo.

¹⁶ Harie, noe zivilie, a khriepfü, u nei ketholie. Avu yakouzhü sü pejo rükhri.

¹⁷ Avu kitheko sedar se chü, tsiu terhuko tehou se chü.