Seyiedze Kenieu 3 - Angami Naga CL (Re-edited) Bible (BSI)Solomon Rüsuokiu Kechü Dze ( 1 Kedi 6:1-38 ) 1 Sidi Solomon-e Jerusalem nu Jihova thuo pie puo puo David pengukeshü thechüu, David-e Ornan Jebusmia sieu nunu kesekeshü Moria kijüthou geinu Kepenuopfü kiu chü sedevüta. 2 Puo kedi chükelie cie diau nu thekhrü kenieu teisozha kenie nhie mhachü sedelie. 3 Ukepenuopfü kiu chüketuo la Solomon-e puo kezhakechako rhükelie hakemhie: Puocha, keriekimia mha kemejü rhi nu, thu hiesorou, mu puozha thu mepfü. 4 Kidzütsa kijü khro chau thu mepfü, kiu zha de, mu puo rükrie thu krie puo di mepfü. Süu puo nutsa suna kevithopfü pie da phre. 5 Ki kezhau saipres sei pie puo sozha chü mu suna pie da mu sügei kukuo mu kedoukecü rhishü. 6 Puoe ketsie puoma kereko rei pie kiu ketso. Sunau we Parvaim nu sunapfü. 7 Puoe suna pie kinu kizoko, phiprako, sozhako mu kikhako dawa, tsiu cherubnie rhi pie sozha gei shü. 8 Puoe kemesatho chüu kechü; puochae kiu zha de di thu mepfü, mu puozha thu mepfü, puo süu suna kevithopfü talent krie sorou pie da. 9 Gojalko mesi suna shekel hiepengou mesi de. Puo kibou pesoko suna pie da phre. 10 Kemesatho chüu nu sei pie cherub kenie rhi di suna pie da. 11 Cherubnie shü kesa thu mepfü: Unie mia puo shü puo thu pengou di sozhau kupfü ba, mu shü kekreiu rei thu pengou di cherub kekreiu shü nyü ba; 12 cherub hau shü puo thu pengou di kiu sozhau nyü ba, shü kekreiu rei thu pengou di cherub kekreiu shü nyü ba. 13 Cherubnie shünie shü kesakeshü thu mepfü. Cherubnie u phi gei tha di kiluo petsou tha. 14 Siro Solomon-e puo keyapfhe linen kemesepfü pfhe keloshü mu kemege mu kemerie geinu cherubnie rhi sashü. 15 Kidzütsa co kezha thu serepengou rükriecü kenie chü sashü, puo gei puotsü puo thu pengoungou ba. 16 Puoe thegiro kedoukecü pie conie tsüle gei gou; mu turaü si krie puo chüpie thegi kedoukecü gei khashü. 17 Puoe conie sepie rüsuokiu mhodzütsa shü, puo bu thezatsa, kekreiu bu thevitsa idi; puoe thezatsa kebau üse Jakin, mu thevitsa kebau üse Boaz üdi kie. |
The Bible Society of India
© 2023, Used by permission. All rights reserved. More
Bible Society of India