Samuel Kerieu 9 - Angami Naga CL (Re-edited) Bible (BSI)

Samuel Saul Kenhekelie

¹ Süki Benjaminmia kenyimia puo tuo, puo za Kish; puoe Afia nuou Bekorat nuomia Zeror nuou Abiel nuo;

² puo nuo puo za Saul ücü puo ba, mu süu khriesa puorhi vi secü puo. Saul-e Israelmia nuonuo donu miapuorei puo mhie kemo kevitho puo. Tsiu puo bouka nunu mia kekrei pete ki rei rükrie.

³ Siro Saul-nuo puo Kish gada kro puo jüta, sitse Kish-e sie puo nuou Saul ki, “No kituomia puo ze salie di tsie vo gadako pfhücie,” sita.

⁴ Süla unie Efraim chazoukhruko mu Shalisha kijü pete pfüthe vo, derei ngulie mo. Süsie unie Shalim kijü pfüthe vo, derei sünu rei tuo mota. Süla unie-e tuo zo Benjamin kijü rüvie pete pfüthe vo derei sünu rei gadako ngulie mota.

⁵ Süsie unie Zuf kijü nu vorlie tse, Saul sie kituou ki, “Ge! Avu la votatuo, moro a puoe Gadako la monyü avu la puo nou kemezhie batalie vimu.”

⁶ Derei puoe puo ki, “Rüna hanu Kepenuopfü themia, therhukepfümia puo baya, mu puo kepu pete chü tseilieya; tsie avu sünu vo khe; puo avu bu voketuo chau pushü reilie vimu.”

⁷ Sitse Saul-e kituou ki, “Sirei avu süu ki vo liro, kedipuo pie puo tsü ta? Avu likhuo nu kecüca tuo mote, tsiu keneishiephruo pie Ukepenuopfü themiau tsüketuo puorei jü. Avu kedipuo ba mu?”

⁸ Kituou la sie Saul ki, “Harie, a a dzie nu rakachü shekel dia-zapuo ba, a süu se Ukepenuopfü themiau tsütuo, sidi puo bu avu cha thashütuo.”

⁹ (Thiedzü Israel nu mia puoe Ukepenuopfü ki vo mha ketsotuo üro puoe sie, “Úko siedzekenguu ki vo khe,” siya. Tsiedo siedzekesiu ükezhau thiedzü puoü siedzekenguu üya.)

¹⁰ Sitse Saul puo kituou ki, “Süu puotoute. Viwe, avu sünu vo khe.” Sidi unie Kepenuopfü themiau keba rünau nu vo.

Saul Samuel Ze Kesekecü

¹¹ Sidi unie chazoukhru gei rünau nu khozhü ru, rüümia kro puo dzüütuoü parzhü di keselie, sitse unie uko ketso di sie, “Siedzekenguu haki ba me?”

¹² Ru uko unie ki, “U, puo haki baya, mu harie puo nnie mhodzüki phizhü ho, rükri phi ro puo selietuo. Puo thie nu rünau nu vor, kekreilamonyü thie themia pete thechü kerükrie gei kho ruosuo chütuo üya.

¹³ Nnie-e rünau nu lelie mumetha puo thechü kerükrie nu kho mhacüketa mhodzü puo ngulietuo, puo vor ruosuo kechüu nu jashü kemochie themiako, mhacülie lhocü la. Sidi puo jakeshü sie nu kiepie kebako mhacütuo. Süla nnie tsie kholiecie, nnie puo ze kese mhailieketuo la.”

¹⁴ Süla unie-e kholie di rünau nu lezhü ru, harie, Samuel-e thechü kerükrieu nu khotuoü par unie ze keselie.

¹⁵ Siro Saul kevor mhodzü nhie Jihovae Samuel ki pukecü;

¹⁶ “Sodu hateiki a Benjamin kijü nunu themia puo ketse n ki shütuo, mu no puo kenhepie a themia Israelmiako mho kedi chüliecie, puo Filistinmia dzie nunu a themiako kelalietuo, a a themiako mezhie ngushüte mu uko kekra pfhe khor a tso bate.”

¹⁷ Sidi Samuel-e Saul ngushü mumetha Jihova puo ki, “Harie, a n ki kepu themiau sü hauha zo, mu puo bu a themiako mho kedi chütuo.”

¹⁸ Süki Saul-e Samuel penuo care ki phi di sie, “Siedzekenguu ki kirapuo ba shi a ki pushücie.”

¹⁹ Sitse Samuel-e Saul die kela di sie, “Ae siedzekenguu zo, legei a mhodzü ruosuochüu nu kholiecie, no thie a ze mhacütuo, siro khise a n nounyü pete pushütuo, sidi n ketse lashüwatuo.

²⁰ Tsiu siro, n gadako zha se voketa ki jüketako la we n noumeca morei vi, kekreilamonyü süko nguliete. Siro harie, Israel pete menguu supuo gei bata ga? N gei, mu n puo kinumiako gei ba mo üme?”

²¹ Sitse Saul puo die kela di sie, “Ae Israel seyie kecütho-u Benjaminmia ze, siro a puonuomia rei Benjaminnuomia donu puotsanuo kecüthoyo ze, siliro no kiüdi hamhiekecü die se a ki puya mu?”

²² Süsie Samuel-e Saul mu puo kituou ze kibouu nu vor di unie bu kiekeshüko donu thechü kevitho-u nu balie, mu süko mia ser mese.

²³ Sidi Samuel-e sie mhachau ki, “A n bu kha kreipie balienukeshü muokhrieu se vorcie.”

²⁴ Ru mhachaue kha kreipie keba puodo-u pie vor Saul mhodzünu shü. Sitse Samuel-e sie, “Harie hau n la khapie ba ho. Cüliecie; puotei chiepie kebau la hau kha kreipie ba, n bu rüsomia ze mhacüketuo la kha kreipie bawaketa la.” Sidi sünhiesü Saul-e Samuel ze mhacülie.

²⁵ Sidi ukoe thechü kerükrieu nunu rünau nu kerlie tse, ki tsü geinu Saul la kezhü chü puo keseshü, sidi puo sünu zhü di zetsuta.

²⁶ Siro teisolie tse Samuel-e ki tsü gei khor di Saul kie di, “Sielie, a n ketseshüwatuomu.” Sitse Saul sielie di Samuel unie keze cha nu tuo vota.

Saul Kenhekelie

²⁷ Sidi uko rünau cietazhü tse Samuel-e Saul ki, “N kituou bu avu mhodzü votaliecie mu puo tuo vota zorei, no zo we thazalie di a bu Jihova die pie n ki pushücie.”