Samuel Kerieu 8 - Angami Naga CL (Re-edited) Bible (BSI)

Israel Kedi Puo Chaketa

¹ Situo di Samuel-e tsata tse, puoe puo nuonie bu Israel capi chü.

² Puo nuo nuorieu za Joel mu nhicuu za Abija, mu unie-e Beersheba nunu capi chü.

³ Derei puo nuonie puo cha nu tuolie mota, sidi unie-e unie ya kevi, thesokelie mu kecürücütsa vota.

⁴ Sitse, Israel phichüko pete vo kengulie di Rama nu Samuel ki vor,

⁵ sidi puo ki, “Harie, no tsate mu n nuonie n chako nu tuo mote; süla seyie kekreiko kemhie hieko kekhaketuo kedimia puo khapie hieko tsücie,” sita.

⁶ Derei uko, “Kedimia puo bu hieko kekhacie” ikecü dieu Samuel-e puo nei mota; süla Samuel-e Jihova ki cha.

⁷ Sitse Jihovae Samuel ki, “Themiako n ki kepu pfhe pete rünyüliecie, ukoe n melie ba mo, derei a bu uko mho di lho üdi a melie batacü la.

⁸ Ae Ijipt nunu uko ze kepar nhie yawinu vor thie ketso ukoe a khawa di, terhuo kekrei lie chüketa tuoi, ukoe n gei rei sükemhie chü bate.

⁹ Sirei uko die rünyüliecie, sidi kediu uko mho kekhaketuou zhoko pu pecü sepie uko tarhoshüliecie.”

¹⁰ Sitse Samuel-e Jihova die pete pie puo ki kedi cha kethako ki pushü.

¹¹ Sidi puoe pukecü, “Nieko mho diketuou nieko gei hakemhie chütuo; puoe nie nuonuo thepfuko zetatuo, sidi uko bu puo kierko mu puo kierbageiko ze tuotuo, siro huomia bu kierbageiko mhodzü ta vokecü chütuo.

¹² Siro puo huomia kedapie nyiemhokezha chü mu hiepengoumhokezha chü, mu kekrei huo bu puo liephie mu huomia bu retuo, tsiu puo terhü rünyie mu kier nyako chütuo.

¹³ Tsiu puo nieko nuonuo thenuko pie tier kethengu kechümia, mhachamia mu niekhrüda riekecümia chütuo.

¹⁴ Puoe nie khubelie mu oliv lie kevithoko liepie puo kituoko tsüwatuo.

¹⁵ Siro puoe nieko lha mu nieko khube lieyie ker-zapuo lielie di pie puo capi kezhako, tsiu kituo kezhako tsüwatuo.

¹⁶ Tsiu puoe nie kituo thenu mu thepfu tsiu nie kiri mu nie gada kevithoko teze vo puo lie chütatuo.

¹⁷ Puoe nie kuo ker-zapuo lielietuo, mu nieko zorei puo die chütatuo.

¹⁸ Siro teisozha süu vor tse, nie thuo kedakelie kediu la nie mezhie rükhruotuo, sirei Jihovae sünhie nie pfhe rünyülie lho.”

Israel Kedi Chakecüu Khashükewa

¹⁹ Sirei themiako Samuel pfhe ze mvüta, sidi ukoe, sie “Molie, kedi puo bu hie mho di zotuo;

²⁰ sidi hie rei seyie kekrei mhiei; tsiu hie kediu bu hie kekhatuo, tsiu hie mhodzü chathau chü di terhü kechü nu hieko rei mia ze kegeituolie.”

²¹ Siro Samuel-e themiako pete pfhe rünyülie, di pie Jihova ki pu lashü.

²² Sitse Jihovae Samuel ki, “Uko pfhe rünyülie di kedimia puo khashü uko tsüwalie.” Süsie Samuel-e themiako ki, “Nie pete rei nie thuo nie rüna nu la vo phretaliecie,” siwa.