Samuel Kerieu 7 - Angami Naga CL (Re-edited) Bible (BSI)

¹ Sitse Kiriat-jearim themiakoe tsur di Jihova dietseidiekhobouu pieta. Ukoe süu pie vo chazoukhru gei Abinadab kinu khapie bata. Sidi ukoe puo nuou Eliazar bu Jihova dietseidiekhobouu pfheketuo la puo chü kemesalie.

² Tsiu sünhienu dietseidiekhobouu Kiriat-jearim nu bata, siro puotei cha pereta, teicie mepfü sünu bata. Sitse Israelmia pete rei Jihova ki thekrü chü di kekhruo chata.

Samuel Israel Capi kechü

³ Sitse Samuel-e Israelmia pete ki pu di, “Mhanuü niekoe nieko melou pete se rürei Jihova kitsa vozhü üro nieko donu terhuo kekrei mu Astartko khawalie. Sidi nie melou kereipie Jihova kitsashülie, sidi puo lie rübei chülie, silie ro puoe Filistinmia dzie nunu nieko kelashü zotuo.”

⁴ Süla Israelko Baalko mu Astartko kha phrewa di Jihova lie rübei chüta.

⁵ Siro Samuel-e sie, “Israelmia pete ze vor Mizpa nu kenguliecie, sitse a Jihova ki nieko la chashütuo.”

⁶ Sidi uko vor Mizpa nu kengulie tse, dzüülie di rupie Jihova mhodzünu shü, mu sünhie mevo mu uko kejo phra di sie, “Hie Jihova mhodzünu phoumawate,” ilie. Siro Samuel-e Mizpa nu Israelko capi chü.

⁷ Siro Filistinkoe Israelko Mizpa nu kengu keba sishü tse, Filistin kedikoe Israelko perhietuo üdi khor. Mu süki Israelkoe süu dze sishü tse, uko Filistinko michie bata.

⁸ Sidi Israelko sie Samuel ki, “Jihova úko Kepenuopfü bu Filistinko dzie nunu u kelashüketuo la puo ki cha pete hie zocie.”

⁹ Sitse Samuel-e tekuonuo nu keba yopuo pete thepie ruosuo chü Jihova tsü; tsiu Samuel-e Israel pete la Jihova ki puo mezhiemelo, sitse Jihovae puo kecha rünyülie.

¹⁰ Siro Samuel-e ruosuou khashükeba ki, Filistinkoe Israel bietuoü penuo vorta. Derei Jihovae sünhie teise kemeriekecü khashü di uko bie kemidepie kebvükerhüwa, sidi uko Israel mhodzü tata.

¹¹ Tsiu Israelkoe Mizpa nunu parlie di Filistinko whuo mu gei zo Bet-kar cie vowa.

¹² Sitse Samuel-e ketsie puo chülie, di süu pie Mizpa mu Jeshana unie donu seshü di puoe süu üse Ebenezer üdi kielie, puoe, “Jihovae ha ketso u khruohi vorshü zo” idi.

¹³ Sidi Filistinko penyükewa sie uko la khor Israel rüvie whuo sa mota. Tsiu Samuel kerhei chie, Jihova dzie-e Filistinko perhiepetsou tuo tso.

¹⁴ Tsiu Filistinko Ekron nunu Gath ketso Israelmia rüna liekelieko kha lashüwa, siro, Israelko Filistinmia dzie nunu puo tierie kijüko lie lalie. Siro Israelko mu Amorko donu rei vitho bu balie.

¹⁵ Siro Samuel-e puo rhei chie Israel capiu chü.

¹⁶ Puoe teicie puo nu va puopuo idi Bethel, Gilgal mu Mizpa hako nu whi vo di capiu chü Israel nyie mezaya.

¹⁷ Puo sidi Rama nu la vortaya, sünu puo ki bacü la, di sünunu Israel la capi chüya. Sünu puoe ruosuoba puo chüpie Jihova tsü.