Samuel Kerieu 6 - Angami Naga CL (Re-edited) Bible (BSI)

Dietseidiekhobouu pie Israel Tsü Lakewa

¹ Siro Jihova dietseidiekhobouu Filistin rüna nu khrü thenie bata,

² sitse Filistinkoe zievoko mu themouko kielie di sie, “Hieko bu Jihova dietseidiekhobouu pie kedipuo chü ro vituo ga? Kimhie di ketse lapie puo tha nu shü ro vituo shiü hie ki pushücie.”

³ Sitse ukoe sie, “Mhanuü nieko Israel Kepenuopfü dietseidiekhobouu ketseshütuo üliro, süu methuo ketseshü hie, derei nieko kehoupuo chü rei jokewa ruosuo puo sa di khashüwaliecie, silie ro nieko shürholietuo, mu nieko rhalietuo, siro nie geinu puo dzieu teshü lalie lho me?”

⁴ Sitse ukoe sie, “Kejo ruosuo kimhiecü puo se puo tsütuo ga?” Ru ukoe sie “Filistin niepuko mia kitsuo shikecü rhi nu suna pie kechü tichü miarhi pengou mu suna pie kechü thezu miarhi pengou khashütuo; thepetheruo puo nie gei mu nie niepuko gei tuotakecü la.

⁵ Süla nieko nie kijü bie pesuokewa tichü miarhi mu thezu miarhi rhiliecie, sidi zapuzayie pie Israel Kepenuopfü tsüliecie, silie ro puoe nie gei, tsiu nie rhuoko gei mu nie kijü gei puo dzie kethelie rei si lhomu.

⁶ Kiüdi Ijiptmia kediu mu puo themiako mhiei nie nou re ba zotuo ga? Puo kepechü se pethashü tse, ukoe Israelko bu tuotanu uko ketsewa di uko bu tuo uko cha nu vota mo me?

⁷ Süla tsie bagei kesa puo chülie, siro puo nuo nu keba thukrü vocie pfü chie kemo kenie selie. Sidi thukrünie pie bagei gei kheshülie, derei puo nuonie ze vo kinu khepie bawalie.

⁸ Sidi Jihova dietseidiekhobouu pie bagei gei shülie, mu nieko kejo ruosuo la suna se chüpie kebako pie puo khieki mhabou puo nu shülie, di ketsewalie, mu puo thuo ta puo cha nu votalie.

⁹ Tsiu süu meho balie, mu harie, mhanuü süue puo thuo chau ze di Bet-shemesh nu vota liro, puo thuo kepeka hau se vor úko gei shü zo, derei si moliro thepe hau puo kinu vor mo, sirei kethekhrücü puo geinu vor ücü silietuo.”

¹⁰ Sitse themiakoe sükemhie chülie, sidi thukrü kenie ze vor di sünie pie bagei gei khelie, mu puo nuonie pie kinu khewa.

¹¹ Siro ukoe Jihova dietseidiekhobouu pie bagei gei shülie, mu suna pie kechü thezu mu tichü mirhi bouu sa di khashüwa.

¹² Sitse mithunie-e Bet-shemesh chau ze mezhü zo vota, sidi rürei thezatsa morei thevitsa rei va chie mo di chaüu ze tuo chakhrie mo zo vota. Tsiu Filistin kediko rei Bet-shemesh tierie nu ketso sünie siepie vo tso.

¹³ Süteiki Bet-shemeshmia kijü razha nu thoulha re ba, sidi uko tosie ru, dietseidiekhobouu ngushü, sitse uko uko nei phi di vo süu ze kese.

¹⁴ Siro bageiu Bet-shemeshmia Joshua lie nu lerlie, di thata, süki ketsie kezha puo zhü; sitse themiakoe bagei seiko phrolie, thukrünie dukhrilie di kethe ruosuo chüpie Jihova tsü.

¹⁵ Siro Levimiakoe Jihova dietseidiekhobouu mu suna miarhiko puo nou ketuo mhabouu se kerlie, di süko khapie ketsie kezhau gei shüwa. Mu sünhie Bet-shemesh themiako kethe ruosuo mu khakeshü ruosuo chüpie Jihova tsüshü.

¹⁶ Tsiu Filistinmia niepu pengoukoe süu nguwata tse, ukoe sünhie la Ekron nu vota.

¹⁷ Filistinmiako jokewa ruosuo la suna pie kechü tichü miarhi pengouko, nadi hako la, puopuo khashü; Ashdod, Gaza, Ashkelon, Gath, mu Ekron.

¹⁸ Tsiu siro suna zuko rei Filistinmia niepu pengouko rüvie nu keba rünako la puopuo, mu dahou houkewa nadiko, siro Jihova dietseidiekhobouu khapie keba tsiediu pie zhapu puo chü di Bet-shemeshmia Joshua lie nu zhüya zo.

Dietseidiekhobouu Kiriat-jearim nu Voketa

¹⁹ Siro Bet-shemeshmiako Jihova dietseidiekhobouu zekelie ki, Jekonia yiemiako uko ze di u neilie mota. Süla puo bu uko mia hiethenie dukhriwa. Sidi themiako bu thekrü chü phi, Jihovae themia dukhri phikewa la.

²⁰ Sitse Bet-shemeshmiakoe sie, “Supuonie Kemesa Ukepenuopfü Jihova mhodzünu thalie vituo ga? Puo ketsepie suomia ki shüwalie vituo ga?”

²¹ Sidi uko dieliemia ketsepie Kiriat-jearim nu kelhouko ki shü di sie, “Filistinmiako Jihova dietseidiekhobouu se la vorshüwate, süla nieko ker di süu se nieko ki khotaliecie,” sishü.