Samuel Kerieu 5 - Angami Naga CL (Re-edited) Bible (BSI)

Dietseidiekhobouu mu Filistinko

¹ Filistinkoe Ukepenuopfü dietseidiekhobouu tekelie sie, Ebenezer nunu se Ashdod nu vorta.

² Sidi ukoe süu pie Dagon rüsuokiu nu vor di Dagon khieki pie bawa.

³ Siro süsienhie Ashdod nu themiako khiserüna vor ru, harie! Dagon sü puo zie pesu di tetsu Jihova dietseidiekhobouu phi nu zhücü ngulie; süla ukoe Dagon pie la sie puo tha nu shüshü.

⁴ Derei uko süsieduü rüna la sier ru, harie! Dagon-e puo zie pesu di tetsu Jihova dietseidiekhobouu mhodzünu zhü di ngu lalie, tsiu Dagon tsü mu puo bounie tetsu kiluo nu zhüta di puo mo-u rübei bacü zota.

⁵ Süla thie ketso Dagon zievo-u shierei morei kekreimia rei Dagon rüsuoki nu kevor pete rei Ashdod nu Dagon kiciela nu kedeya mo.

⁶ Siro Jihova dzieu Ashdod mu sükhieümhou rüna pete nu themiako gei re se di uko pekata di tichü sa se vor uko pechüpenyü phita.

⁷ Mu Ashdod nu themiako mha hako ngu tse ukoe “Israel Kepenuopfü dietseidiekhobouu bu u donu ba sa suote, puo dzie u gei, tsiu u rhuo Dagon gei rethorte,” sita.

⁸ Süla uko Filistin krütako kelie ze vorlie di sie uko ki, “Israel Kepenuopfü dietseidiekhobouu pie kedipuo chü ro vituo ga?” Sitse Gad nu kelhoukoe, “Kepenuopfü dietseidiekhobouu pie hie pelewalie,” ita. Süla ukoe Israel Kepenuopfü dietseidiekhobouu pie tsu Gad nu shüwa.

⁹ Derei uko süu pie tsu Gad nu shü tse, Jihova dzie-e nadi sünu themiako pechü vüta, süki themiako michie kemerie chüta. Sidi puoe nadiu nu themiako phichünhicu pete gei tichü bu kemerie chü sierta.

¹⁰ Süla ukoe Kepenuopfü dietseidiekhobouu pie Ekron nu tsuwa. Derei Kepenuopfü dietseidiekhobouu pie Ekron nu tsulie tse, Ekron themiakoe sie, “Ukoe Israel Kepenuopfü dietseidiekhobouu pie vor u donu shü di u mu u themia dukhriwatuo üzhie,” sita.

¹¹ Süla uko Filistin krütako kelieshü di uko ki, “Israel Kepenuopfü dietseidiekhobouu ketse lawaliecie, puo bu puo tha nu la votacie, sidi süu bu we rei mu u themia rei dukhri motalie.” Kekreilamonyü kesia kemichie thuo nadiu tshuta, mu Jihova dzieu themiako gei rethorta.

¹² Siro themia sia hu kemoko zorei tichü kere se bu u biewa, mu nadiu nu kekra pfhe si kho teigei tsota.