Samuel Kerieu 4 - Angami Naga CL (Re-edited) Bible (BSI)

Filistinko bu Dietseidiekhobouu Tekelie

¹ Siro Samuel die Israel pete ki vor. Süteiki Filistinko Israel ze terhü chütuo üdi puo kezulie, mu Israel rei uko petsoutuo üdi pra. Siro Israelko Ebenezer nu mu Filistinko Afek nu idi razhü chü balie,

² mu Filistinko Israelmia perhietuoü jiepfü thalie di uko pra terhü chü tse, Filistinko bu Israelko penyüwa mu rüyachü nunu uko mia nyie dia dukhriwa.

³ Tsiu rüpfhünuoko razhüchü nu la vorlie tse, Israel nu phichükoe sie, “Kiüdi thie Jihovae Filistinko mhodzünu u gei keka hau se vorshüta mu? Úko vo Shilo nunu Jihova dietseidiekhobouu se haki vorta khe, sidi puo bu vor u donu bakelie sie u ngumvümia dzie nunu kelalie rei si lho mu?”

⁴ Süla ukoe themia ketseshü di süko bu Shilo nu krodiko Jihova dietseidiekhobouu, puoe sünu Cherubnie gei bayakezhau se vorlie. Tsiu Eli nuo Hofni mu Finehas unie sünu Ukepenuopfü dietseidiekhobouu ze tuo.

⁵ Sidi Jihova dietseidiekhobouu se razhüchüu nu vorlie tse, Israelmia pete shie petoshü ru kijüu va keza vota.

⁶ Siro shiekeshü pfhe sishü tse, Filistinkoe sie, “Ibriko razhüchü nu shie keba kedipuo la ga?” sita! Süsie ukoe Jihova dietseidiekhobouu razhüchü nu vorta ükecü silie.

⁷ Sitse Filistinkoe süu la michieta mu uko par di, “Terhuomiako uko razhüchü nu vorte.” Tsiu ukoe sie “Co, úko chülietie! kekreilamonyü thiedzü hakemhie chü chie mo eru.

⁸ Úko sü chülietie! Supuo terhuo kezha hako dzie nu u kelashülie vituo ga? Sükoe rayha nu thepetheruo khe se Ijiptmia pekakewa terhuoko zo.

⁹ Thepfulie mu meteilie Filistinko, sidi thepfumia tuoi dojülie; moliro Ibrimia nie die chü ketuo tuoi nie rei Ibrimia die chütatuo. Thepfumia chüterhü chücie.”

¹⁰ Sidi Filistinko pra terhü chü ru Israelko penyüwa mu ukoe tata, u thuo u kinu vota. Siro themia rei geithorwa, sidi Israelmia thephi rüpfhünuo nyie ser tetsuta.

¹¹ Siro mia bu Ukepenuopfü dietseidiekhobouu telieta, tsiu sünhie Eli nuo Hofni mu Finehas unie rei siata.

Eli Se

¹² Sünhie Benjaminmia puo terhü nunu talie di Shilo nu vor, tsiu puo pfhe cierha mu nyophe pie puo tsü gei shüpfü tuo.

¹³ Puo vor tsolie, sükisü Eli-e cha khieki theba puo geinu pfhe ba, puoe Ukepenuopfü dietseidiekhobouu la puo melou pebaketa la. Siro themiau nadiu nu lelie di kedipuo chüte shikecü dze pushü tse, nadiu nu pete kra shiekhouita.

¹⁴ Siro Eli-e kekra pfheu si tse, “Themia krodi pfhe hau kiüta ga?” Sitse themiau rükri ta Eli ki vor di pushü,

¹⁵ sükisü Eli-e cie hiethepfüethethata, siro puo mhi merüta mu mha ngulie kenjüta.

¹⁶ Themiaue Eli ki, “Rüyachü nunu a taliete, sidi thie a ta zo vorzhülie.” Sitse Eli-e sie, “Kedipuo mhieta ga? a nuo.”

¹⁷ Sitse themiau sie puo ki, “Israelko Filistinko mhodzü thalie mote, siro rüpfhünuoko rei biethorwate, sizomonyü n nuo Hofni mu Finehas unie rei siate, mu mia bu Ukepenuopfü dietseidiekhobouu rei teliete.”

¹⁸ Siro puoe dietseidiekhobouu dze pushü tse, Eli-e puo ba nunu mela tsu puo vo kesetshewa di siata, puoe tsa mu mesi baketa la. Puoe cie hiedia Israel capi chü.

¹⁹ Sitse puo miepfü, Finehas kimia phoupiemo tuo di nuoze tei tso bata. Ru puoe Ukepenuopfü dietseidiekhobouu teseketa, tsiu puo meiu mu puo nupfu siaketa silie tse, puo nuonuovachü puo gei vorta, di puo thuo nuketsu di penuoshü, (derei puo mhachü la la sierlie mota),

²⁰ Tsiu puo siatazhücü ki, puo thekepfükoe sie, “Michie hiecie, no thepfunuomia puo penuoshüte ho,” sishü. Derei hapfüe uko pfhekho mota, mu uko dieü mhaü mota.

²¹ Sidi puoe unuoyo zathopie Ikabod chülie, puoca, “Zapuzayieu Israel kinu tuote.” Mia bu Ukepenuopfü dietseidiekhobouu telieta tsiu puo meiu mu puo nupfu rei siaketa la.

²² Sidi puoe sie, “Zapuzayieu Israel kinu tuote, Ukepenuopfü dietseidiekhobouu telieketa la,” si.