Samuel Kerieu 31 - Angami Naga CL (Re-edited) Bible (BSI)

Saul mu Puo Nuonuoko Se Dze

¹ Siro Filistinko Israel ze kegei mu Israelko Filistinko mhodzü nunu tata, mu mia kekra Gilboa Kijüthou geinu tetsuta.

² Siro Filistinko Saul mu puo nuonuoko mho kuolieta; sidi Filistinkoe Saul nuonuoko Jonathan mu Abinadab tsiu Malkishua dukhriwa.

³ Siro terhüue Saul gei re seta; süki theükepiekoe puo pewa, mu puoe theükepieko geinu rüza pesuo sewa.

⁴ Sitse Saul sie puo rünyie kepieu ki, “N zhiecha zoulie di süu pie a zewacie, sitse u zhürekemo hako vor di a zewa mu a pie rüzhüwa molietuo.” Derei puo rünyie kepieu puo medo mota; kekreilamonyü puo bie kemide sewaketa la. Süla Saul puo thuo puo zhiechau zoulie di te sügei tsuta.

⁵ Siro puo rünyiekepieu rei Saul siaketa ngu tse, puo rei te puo zhiechau gei tsu sidi puo ze siazhüta.

⁶ Sidi Saul mu puo nuonuo seko tsiu puo rünyiekepieu siro puo themia pete keze khunhie se chüta.

⁷ Siro Israelmia razha lutsakhie ketuoko mu Jordan khie lutsa ketuokoe Israelko taketa mu Saul tsiu puo nuonuoko siaketa ngu tse, ukoe u rüna khawa di tata; sitse Filistinko vor di süko nu lhouta.

⁸ Süsienhie, Filistinko kesiamia vie rhuolietuoü vorkecü ki, ukoe Saul mu puo nuonuo seko Gilboa Kijüthou geinu siakezhü ngulie.

⁹ Sitse uko puo tsü zielie, puo rünyieko rhuolie, sidi dieliemia ketsepie Filistinmia kijü pete nu terhuorhi kiko nu mu themiako pete ki thedze kevi süu pu pesishünu ketseshü.

¹⁰ Sidi ukoe puo rünyieko pie Astoret rüsuokiu nu bawa; mu puo mo-u pie Bet-shan sozha gei phapie zhawa.

¹¹ Derei Jabesh-gilid nu kelhoumiako Filistinko Saul gei chükeshüko sishü tse,

¹² themia kethepfu khe sielie di teizeizha pete tuo vo di Bet-shan sozha geinu Saul mu puo nuonuoko mo chülie. Sidi uko Jabesh nu vorlie di sünunu uko thewa.

¹³ Süsie uko ruko chüse vor Jabesh nu tamariskbo puo khronu khruwa, di zha thenie mevo.