Samuel Kerieu 30 - Angami Naga CL (Re-edited) Bible (BSI)

Ziklag Pekakewa la David Khepukelie

¹ Siro zha se nhie David mu puo themiako Ziklag nu vor tse Amalekkoe Negeb mu Ziklag perhie. Sidi ukoe Ziklag perhie di süu mi pie thewa,

² tsiu thenuko mu sünu keba kecükezha pete teze kedie chü vota; ukoe süko puorei dukhriwa mo, derei süko zeta, sidi uko cha nu vota.

³ Siro David mu puo themiako nadi nu vor tse, ukoe süu thepie zhükewa mu uko kimianuoko mu u nuonuo thenu rei thepfu rei ze kedie chü phreketa ngulie.

⁴ Sitse David mu puo ze ketuo themiako uko pfhephra sie di krata, sidi uko kekuo jüta kemochie kra bata.

⁵ Siro David kimia kenienie Jezrilpfü Ahinoam mu Karmelmia Nabal kimiapfü Abigail rei tezeta.

⁶ Süla David-e kemichie se puo nu bata; kekreilamonyü themiako ketsie pie puo pewatuoü putacü la, themia pete u nuonuo thenu rei thepfu la rei u nousuo phi bata. Derei David we puo Kepenuopfü Jihova geinu puo thuo puo chü pekuolie.

⁷ Sitse David-e sie Ahimelek nuou Abiathar zievo-u ki, “Zievoboulieu se a ki vorcie,” sishü. Süla Abiathar zievoboulieu se vor David tsüshü.

⁸ Sitse David sie Jihova ketso di, “A bu themia kro hau whuotuo me? A uko mho kuolietuo me?” Süki puoe puo die kela di, “Whuo volie, kekreilamonyü no uko mho kuo toulietuo mu uko kela lalie tou zotuo.”

⁹ Süla David tuo vo, puo mu puo ze ketuo themia krie sorouko. Sidi uko Besor rücüu nu vorlie tse sünu mia sie baketuoko bu bata.

¹⁰ Derei David-e tuozhü zo, puo mu mia krie diako; mia krie kenie khapie bawa. Ukoe meziethor vo Besor rücüu cie pralie kenjüta.

¹¹ Ukoe rünau phouyo nu Ijiptmia puo ngulie, sidi puo ze David ki vor. Sitse uko niekhrüda pie puo tsüshü mu puo süu cülie; uko dzü pie puo bu krienu di khashü;

¹² uko chiede niekhrüda da puo mu khube kro puo rei sa pie puo tsüshü. Sidi puo mhacülieta tse; puo shürhei la vorlie; puo teisozha se mu teizeizha se mhacümhakrie mo tuoketa la.

¹³ Siro David puo ki, “No kiramia ga? No kirapuo nu vor ga?” Sitse puo sie, “Ae Ijiptmia khriesa kemedzü yopuo zo, Amalekmia kituo chüya. Sirei a niepuu zha se voketa ki a mhachüketa la a khawate.

¹⁴ Siro hieko Keretmia Negeb nu kebako mu Juda viekecüko, tsiu Kaleb Negeb re tsu; sidi hieko Ziklag thewa.”

¹⁵ Sitse David sie puo ki, “No a ze mia rekecü kro hau nu voshütuo me?” Puo sie, “No Ukepenuopfü za se a dukhriwa lho ücü morei a khapie a niepuu tsüwa lho ücü rüseshülie, sitse a n ze tsu uko ki shütuo.”

¹⁶ Sidi puoe puo ze ke ru uko kijü pete ketshu chüpfü ba, ukoe Filistinmia kijü mu Juda kijü nu mha kekra vakelie la, mhacümhakrie, tsiu u dowhuo ba.

¹⁷ Sitse David-e teizei geinu uko re zo ba süsienhie thevatie ketso. Miapuorei lhieshü mo, khriesamia mia krie dia, ut geinu taketako zo kemosie.

¹⁸ David-e Amalekko bu toupfüketa pete ngu lalie mu David-e puo kimia kenienie rei kela lalie.

¹⁹ Mhapuorei pejüwa mo, mha kecükezha, u nuonuo thepfu rei thenu rei, vakelie morei ukoe seketa mhakehoupuorei tseiütso mota mo, sidi David-e mha pete se la vorlie.

²⁰ Siro David tekuokro mu kiri kro te lalie, süko puo mhodzü whuo ze tuo; sitse themiako sie, “Hako David-e vakeliekowe,” si.

²¹ Süsie David-e mia krie kenieko meziethorketa la David siemedzilie kenjüketako, vo di Besor rücüu nu khapie bakewako ki vor. Uko David mu puo ze vorkezhüko ze kesetuoü par. Mu David-e themiako puo penuo vor tse, puoe uko kelushü.

²² Sitse themia kesuo mu puotou kemoko David ze kevoko pete sie, “Kekreilamonyü ukoe u ze vo kemo la, hie mhavakelie puorei pie uko tsülie lho, u thuo u kimianuo mu u nuonuoko zelie di tuotalie” ilie.

²³ Derei David sie, “Nieko bu Jihova khapie u tsükeshüko se silie lho, a siezeko; puoe u se balie mu vor u petsou di u rekecü kro-u pie u dzie nu shü.

²⁴ Supuonie mha hau nu nie pfhe rünyü ta? Kekreilamonyü terhükegeikecü nu keprau, siro mhanya pfhekebau unie zae ketou zotuo.”

²⁵ Siro sünhie yawinu puoe süu pie Israelko la chünukecüzho mu pethokeshüzho chüwa; süu thie ketso rei si tuoya zo.

²⁶ Siro David Ziklag nu vor tse, puo mha vakelie huo ketsepie Juda phichüko puo zeko tsü di pukecü, “Haki nu Jihova ngumvümia vie vakelie ketsepie nie tsüshüzhie.”

²⁷ Sidi Bethel nu kebako, siro Negeb Ramot nu kebako, Jatir nu kebako,

²⁸ Aroer nu, Sifmot nu, Eshtemoa nu.

²⁹ Rakal nu, Jeramilko rünako nu Kenmiako rünako nu.

³⁰ Horma nu, Borashan nu, Athak nu,

³¹ Hebron nu, David mu puo themiako rühou tuoyakezha thechü pete nu shü.