Samuel Kerieu 3 - Angami Naga CL (Re-edited) Bible (BSI)

Jihovae Samuel Kekie

¹ Siro unuoyo Samuel-e Eli ze di Jihova mhodzünu chalie chü. Süteiki Jihova die kevortsa phi, mu pengukeshü kra mo.

² Si tuo di Eli-e puo mhi thachü mu mha ngu merü phita mu puoe puo zhü nu zhü.

³ Ukepenuopfü mitubou pemhe mo ba zoluo, mu Samuel rei Ukepenuopfü dietseidiekhobouu keba Jihova rüsuokiu nu zhü.

⁴ Sitse Jihovae sie, “Samuel, Samuel,” isi ru puoe sie, “A haki bawe.”

⁵ Sidi puoe ta Eli ki vo di sie, “A haki bawe, no a kiekecü la.” Derei puoe sie, “A n kie mo; vo zhü latalie.” Süla puo la vo zhüta.

⁶ Süsie Jihovae kie la di, “Samuel,” sitse puo sielie di ta Eli ki vo di, “A haki bawe, no a kiecü la,” si. Eli sie, “A nuo a n kie mo, la vo zhütalie.”

⁷ Haki Samuel-e Jihova si moluo, mu Jihova die rei pie puo pesipengushü mo zoluo.

⁸ Jihovae va seu Samuel kie la, sitse Samuel sielie di ta Eli ki vo di, “A haki bawe, no a kiekecü la.” Sitse Eli-e Jihovae unuoyo kiekeba silie.

⁹ Süla Eli-e Samuel ki, “Vo zhütalie, sidi puo n kie la liro noe sie, ‘Pushücie, Niepuu, n kituoue rünyü bawe,’ ishülie.” Süla Samuel-e la vo di puo zhü nu zhüta.

¹⁰ Sitse Jihovae vor thalie di puo ki, “Samuel, Samuel” idi puo kie; sitse Samuel-e sie, “Pushücie, Niepuu, n kituou n pfhe rünyü bawe.”

¹¹ Süki Jihovae Samuel ki, “Harie, a Israel donu mhapuo chüshütuo üzhie, mu süu kesi pete u nyieto kenienie mezatatuo.

¹² Sünhie ae Eli kikru gei chüshütuoü pukeshüko pete therie nu thela ketso chü tseishütuo.

¹³ Kekreilamonyü a puo kikruu ketsotuo ükecü puo ki pushüwate, mu kikru kephouma süu puo thuo si ba, süusü puo nuonie Ukepenuopfü pese mu puoe unie kekhalie mote.

¹⁴ Süla Eli ki rüseshüwate, süusü ruosuo mu mha khakeshü se Eli kinuko kephouma chü kemesalie kelho chüwate.”

¹⁵ Sidi Samuel-e teiso ketso zhü di khise sie Jihova kiu kikhako khrüshü. Tsiu puo pengukeshüko pie Eli ki pu michieta.

¹⁶ Derei Eli-e puo kie di, “A nuo Samuel.” Ru Samuel-e sie, “A haki bawe.”

¹⁷ Sitse Eli-e sie, “Jihova n ki kedipuo pu ga? A ki mhapuorei kevie hie; siro puo pukeshüko noe mha huo kevieta ro, Ukepenuopfü bu sükemhie mu sü kezie rei chüpie n gei shütuo.”

¹⁸ Süla Samuel-e mhapuorei kevie mo di pete se puo ki pushü. Sitse Eli-e sie, “Süu Jihova zo. Puo bu puo mhiki mezhü ükecüu chüliecie.”

¹⁹ Siro Samuel zha miemie sielie, mu Jihova puo ze tuolie, mu puo dieko puorei bu te kijü tsuta mo.

²⁰ Siro Dan nunu vo Beersheba ketso Israelmia pete rei Samuel-e pelelie kesü Jihova siedzekesimia puo ücü sita.

²¹ Tsiu Jihovae Shilo nu ba zota, Shilo nu puo die nunu puo thuo Samuel pengushüshütakecü la.