Samuel Kerieu 29 - Angami Naga CL (Re-edited) Bible (BSI)

Filistinko David Meliekewa

¹ Filistinmia u chüpahiko pete ze vo Afek nu kengulie, mu Israelko rei vor Jezril nu dzüluoki khieki nu razhü chü balie.

² Siro Filistinmia niepukoe mia thekriekrie mu nyienyie di vota tse, David mu puo themiako Akish ze di puo sietsa vota.

³ Sitse Filistinko nyiemhokezhakoe sie, “Ibri hako haki nu kedipuo chü ba ga?” Sitse Akish-e sie Filistinko nyiemhokezhako ki, “Hauha David, Israel kediu Saul kituou, teisozha huo mu teicie huo a zetuoketau mo üme? Siro puo vor a zetuokelie nunu vor thie ha ketso puo kejo yopuorei ngulie molie.”

⁴ Derei Filistinko nyiemhokezhakoe puo gei puo nei mota; sidi Filistinko nyiemhokezhakoe puo ki, “Themiau ketse lawacie, sitse puo no khapie puo ketsü thechüu nu la votatuo; puo bu u ze di tsu terhü chülie lho, terhükegeikecü ki puo u ngumvü chüta rei silie lhomu. Kekreilamonyü themia hau kimhie di puo niepuu ze kezevilietuo mu? Süu themia hako tsüko se di si lho üme?

⁵ Hauha David, uko keli mu u dowhuo di huoniehuo ki, ‘Saul-e puo mia nyienyie dukhri, mu David we mia nyie kerür dukhriwa’ ikecüu mo üme?”

⁶ Sitse Akish David kielie di sie, “Jihova rhei ketuo mhie, noe miatho tuo zo, siro razhüchü nunu rüpfhünuoko ze pra mu lekecü a mhiki we vi zo; kekreilamonyü no a ki kevor nhie nu vor thie ketso kekrükecü puorei chü mo. Sizorei niepuko n ze ba nyü mote.

⁷ Süla tsie latalie; mu n nou mene di voliecie, mu no Filistinko niepuko nei kemo puorei chü hiecie.”

⁸ Sitse David sie Akish ki, “Derei a kedipuo chüwata ga? A n ze ketuo yawinu vor thie ketso no n kituou gei kedipuo ngu di a bu vo a niepuu kediu ngumvümia ze kegei lho üta ga?” sita.

⁹ Sitse Akish David die kela di, “Noe Ukepenuopfü dieliemia tuoi a mhodzüki kejo jükecü a si zo, sirei, Filistinko nyiemhokezhakoe sie, ‘Puo bu u ze terhü nu vo suo,’ ite.

¹⁰ Süla khise sie zilie sidi no mu niepuu kituo n ze kevorko ze a thechü thapie n ketsü nu votalie. Siro puotou kemo die hau pie n nou shü se tuo hie, kekreilamonyü no a mhodzüki mhachü pevi phishü zo. Süla khiserüna dojülie di teiso vor mumetha tuotacie.”

¹¹ Süla David mu puo themiako Filistinmia kijü nu la votatuoü khiserüna tuota. Derei Filistinko Jezril nu khota.